నలుగురు పిల్లల ప్రాణాలు తీసిన బోర్డు

న్యూఢిల్లీ: ఢిల్లీ వాటర్ బోర్డు నిర్లక్ష్యం నలుగురు పిల్లల ప్రాణాలు తీసింది. ఉత్తర ఢిల్లీకి సమీపంలోని గోపాల్ పూర్ గ్రామంలో వాటర్ బోర్డుకు చెందిన గుంటలో పడి నలుగురు పిల్లలు మరణించారు. శుక్రవారం రాత్రి ఇంటికి తిరిగివస్తున్న సమయంలో పిల్లలు ఆ గుంటలో పడ్డారు. బోర్డు గుంటను తవ్వి అలాగే వదిలేయడం వల్ల ఈ దారుణం జరిగిందనే విమర్శలున్నాయి.

నెల రోజుల కిందట తాము తవ్విన గుంటను ఢిల్లీ జల్ బోర్డు మూసేయలేదు. దాని నిండా నీరుండడంతో పిల్లలు నీటిలో మునిగి మరణించారు. మృతుల బంధువులు, స్థానికులు వీధులకెక్కి నిరసన తెలిపారు. ఢిల్లీ జల్ బోర్డుపై దీనికి సంబంధించి కేసు నమోదైంది. సంఘటనపై అధికారులు విచారణకు ఆదేశించారు. ఢిల్లీ జల్ బోర్డు చీఫ్ ఇంజినీరును విచారణాధికారిగా నియమించారు. రెండు రోజుల్లో చీఫ్ ఇంజినీరు నివేదిక సమర్పిస్తారని బోర్డు అధికార ప్రతినిధి సంజమ్ చీమా చెప్పారు.