తెలంగాణ: పిఎం వివరణపై వెంకయ్య అసంతృప్తి

న్యూఢిల్లీ: తెలంగాణపై ప్రధాని మన్మోహన్ సింగ్ శుక్రవారం రాజ్యసభలో ఇచ్చిన సమాధానంపై బిజెపి సీనియర్ నేత ఎం. వెంకయ్యనాయుడు తీవ్ర అసంతృప్తి వ్యక్తం చేశారు. కేంద్ర ప్రభుత్వానికి సమస్యను పరిష్కరించే చిత్తశుద్ధి లేదని, ప్రజలను మభ్యపెట్టడానికి ప్రయత్నిస్తోందని ఆయన శనివారం మీడియా ప్రతినిధులతో అన్నారు. రాష్ట్ర విభజన అనేది రాజకీయంగా తీసుకోవాల్సిన నిర్ణయమని, శ్రీకృష్ణ కమిటీ ద్వారా కాలయాపన చేసేందుకు కేంద్ర ప్రభుత్వం సిద్ధపడిందని ఆయన అన్నారు. కమిటీ ద్వారా సమస్యను మరింత జటిలం చేయడానికి ప్రభుత్వం ప్రయత్నిస్తోందని ఆయన అన్నారు.

రాష్ట్ర విభజన విషయంలో కేంద్ర ప్రభుత్వం సరైన హోం వర్క్ చేయలేదని ఆయన అన్నారు. ముఖ్యమంత్రిని, తన పార్టీ పార్లమెంటు సభ్యులను కూడా సంప్రదించకుండా కాంగ్రెసు ప్రభుత్వం రాష్ట్ర విభజనపై ప్రకటన చేసిందని ఆయన విమర్శించారు. డిసెంబర్ 9వ తేదీన కేంద్ర హోం మంత్రి చిదంబరం ఏకపక్షంగా నిర్ణయం ప్రకటించిన తర్వాత అధికార పక్ష నాయకులే ఆందోళనలకు దిగారని, ఈ స్థితిలో మిగతా పార్టీలు అలా ప్రవర్తించడంలో ఆశ్చర్యం లేదని ఆయన అన్నారు. వందలాది మంది మరణిస్తుంటే పరిస్థితిని చక్కదిద్దడానికి ప్రభుత్వం ఏ మాత్రం చొరవ చూపడం లేదని ఆయన అన్నారు.