మహిళా బిల్లు: రేపు అఖిలపక్ష సమావేశం

న్యూఢిల్లీ: మహిళా బిల్లుపై సోమవారం ఓటింగ్ జరగడం లేదు. మహిళా రిజర్వేషన్లలో ఒబిసి, దళిత, ముస్లిం మహిళలకు సబ్ కోటా కావాలంటూ సమాజ్ వాదీ, బిఎస్పీ, ఆర్జెడీలు రాజ్యసభలో తీవ్ర దుమారం రేపాయి. వెల్ లోకి దూసుకెళ్లి అల్లరి చేశాయి. చైర్మన్ హమీద్ అన్సారీ చేతిలోని బిల్లు ప్రతులను తీసుకుని ఆ పార్టీల సభ్యులు చించేశారు. ఈ మూడు పార్టీ సభ్యుల గొడవతో రాజ్యసభ సోమవారం అయిదు సార్లు వాయిదా పడింది. ఈ స్థితిలో ప్రధాని మన్మోహన్ సింగ్ రేపు అఖిల పక్ష సమావేశం ఏర్పాటు చేశారు. లోకసభ కూడా రేపటికి వాయిదా పడింది.

సభలో అనుసరించాల్సిన వ్యూహంపై ప్రధాని మన్మోహన్ యుపిఎ భాగస్వామ్య పక్షాలతో చర్చించారు. లాలూ ప్రసాద్ యాదవ్ తోనూ, ములాయం సింగ్ యాదవ్ తోనూ ప్రధాని మాట్లాడడానికి సిద్ధపడ్డారు. వారితో చర్చించి మధ్యేమార్గం అనుసరించాలని ప్రభుత్వం అనుకుంటున్నట్లు తెలుస్తోంది. మహిళా రిజర్వేషన్లను 20 శాతానికి తగ్గించాలని ములాయం పట్టుబడుతున్నారు. అయితే వాటిని 25 శాతానికి తగ్గించే యోచనలో ప్రభుత్వం ఉన్నట్లు తెలుస్తోంది.