ఆటోతో పల్లంరాజు కాన్వాయ్ ఢీ: ఐదుగురు మృతి

కాకినాడ: కేంద్ర రక్షణ శాఖ సహాయ మంత్రి పల్లంరాజు కాన్వాయ్ లోని ఓ కారు ఆటోను ఢీకొట్టడంతో భారీ రోడ్డు ప్రమాదం సంభవించింది. తూర్పు గోదావరి జిల్లా తొండంగి మండలం బుచ్చయ్యపేటలో ఈ ప్రమాదం జరిగింది. ఈ ప్రమాదంలో ఐదుగురు మరణించారు. మృతుల్లో నలుగురు మహిళలున్నారు. ఆటో డ్రైవర్ కూడా మరణించాడు. గాయపడినవారిలో ఇద్దరి పరిస్థితి ఆందోళనకరంగా ఉంది. ప్రమాదం సంభవించిన సమయంలో ఆటోలో 12 మంది ఉన్నట్లు సమాచారం. గాయపడినవారిని కాకినాడ ఆస్పత్రికి తరలించారు.

కాగా, గ్రామస్థులు మంత్రి పల్లంరాజును నిర్బంధించారు. పల్లంరాజుపై ప్రజలు తీవ్ర ఆగ్రహం వ్యక్తం చేస్తున్నారు. దీంతో పరిస్థితి ఉద్రిక్తంగా మారింది. బాధితులకు ఏం సాయం చేస్తారో చెప్పాలని గ్రామస్థులు మంత్రిని డిమాండ్ చేస్తున్నారు. గ్రామానికి జిల్లా కాంగ్రెసు కమిటీ (డిసిసి) అధ్యక్షుడు చేరుకున్నారు. ప్రజలకు నచ్చజెప్పేందుకు ప్రయత్నాలు సాగుతున్నాయి.