రామోజీ రావుకు రఘువీరా రెడ్డి సవాల్

హైదరాబాద్: మార్గదర్శి ఫైనాన్షిల్ అక్రమాలపై ఈనాడు దినపత్రిక అధిపతి రామోజీరావు, తెలుగుదేశం పార్టీ అధ్యక్షుడు నారా చంద్రబాబు నాయుడు తమ పార్టీ పార్లమెంటు సభ్యుడు ఉండవల్లి అరుణ్ కుమార్ తో బహిరంగ చర్చకు రావాలని రాష్ట్ర వ్యవసాయ శాఖ మంత్రి రఘువీరా రెడ్డి సవాల్ చేశారు. కర్నూలు జిల్లాలో రైతులకు తెలియకుండా జగన్, తదితర వైయస్ కుటుంబ సభ్యులు గనుల భూములను లీజుకు తీసుకున్నారని ఈనాడు రాసిన వార్తాకథనాలపై ఆయన గురువారం మీడియా ప్రతినిధుల సమావేశంలో విరుచుకు పడ్డారు. ఈనాడు వార్తాకథనాలు బాధ్యతారాహిత్యానికి నిదర్శనమని ఆయన అన్నారు.

రాజకీయ లబ్ధి కోసమే కడప పార్లమెంటు సభ్యుడు వైయస్ జగన్ పై ఈనాడు దినపత్రికలో ఆరోపణలు చేస్తున్నారని ఆయన అన్నారు. గత ఐదేళ్లలో దివంగత ముఖ్యమంత్రి వైయస్ రాజశేఖర రెడ్డి చేసిన అభివృద్ధిని తాను చేయలేకపోయాననే అక్కసుతోనే తెలుగుదేశం పార్టీ అధ్యక్షుడు నారా చంద్రబాబు నాయుడు, ఆయనకు కొమ్ము కాస్తున్న మీడియా సంస్థలు వైయస్ కుటుంబ సభ్యులపై తప్పుడు ఆరోపణలు చేస్తున్నాయని ఆయన అన్నారు.