ఓదార్పు యాత్రపై సోనియాకు జగన్ లేఖ

హైదరాబాద్: తన ఓదార్పు యాత్రకు అనుమతి ఇవ్వాలని కాంగ్రెసు పార్లమెంటు సభ్యుడు వైయస్ జగన్ పార్టీ అధ్యక్షురాలు సోనియా గాంధీకి లేఖ రాశారు. తన తండ్రి వైయస్ రాజశేఖర రెడ్డి హఠాన్మరణానికి కలత చెందిన మరణించిన అభిమానుల కుటుంబాలను పలకరించేందుకు ఓదార్పు యాత్ర పేరిట ఏప్రిల్ 2వ తేదీ నుంచి రాష్ట్ర పర్యటనను తలపెట్టారు. దీనికి అనుమతి ఇవ్వాలని జగన్ సోనియాను కోరారు. వారిని ఓదార్చడం తన బాధ్యత అని, అందువల్ల ఆ పర్యటనకు అనుమతి ఇవ్వాలని ఆయన సోనియాతో చెప్పుకున్నారు. సోనియా అనుమతి ద్వారా తన పర్యటనకు పార్టీ ముద్రను సంపాదించుకోవాలని ఆయన చూస్తున్నారు.

పార్టీ అనుమతి లేకపోతే కాంగ్రెసు పార్టీ నాయకులు, కార్యకర్తలు జగన్ తో సహకరించడం ఇబ్బందికరంగా ఉంటుంది. దీంతో జగన్ అనుమతి కోసం ప్రయత్నిస్తున్నట్లు తెలుస్తోంది. కాగా, జగన్ రాష్ట్ర పర్యటనకు పార్టీ అనుమతి అవసరం లేదని ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ ఇదివరకే చెప్పారు. ఆ యాత్ర జగన్ వ్యక్తిగతమని, పార్టీతో దానికి సంబంధం లేదని ఆయన చెప్పారు. జగన్ పర్యటనను రాజకీయం చేయవద్దని కూడా ఆయన కోరారు. అయితే, జగన్ ఓదార్పు యాత్రకు సీనియర్ల నుంచి ఏ మాత్రం సహకారం లేదు. చాలా మంది సీనియర్ నాయకులు మౌనంగా ఉన్నప్పటికీ ఆ యాత్ర జరగకుండా చూసే అవకాశాలు ఎక్కువగా ఉన్నాయి.