రాజీనామాలు వద్దని తెరాసకు చెప్పా: స్పీకర్

హైదరాబాద్: రాజీనామాలు చేయవద్దని తాను తెలంగాణ రాష్ట్ర సమితి (తెరాస) సభ్యులకు సూచించినట్లు శాసనసభ స్పీకర్ కిరణ్ కుమార్ రెడ్డి చెప్పారు. అయితే తెరాస శాసనసభ్యులు తన మాట వినలేదని ఆయన బుధవారం మీడియా ప్రతినిధుల సమావేశంలో చెప్పారు. శాసనసభ బడ్జెట్ సమావేశాలు సంతృప్తికరంగా సాగాయని ఆయన అన్నారు. బడ్జెట్ సమావేశంలో ప్రజా సమస్యలు చర్చకు వచ్చాయని చెప్పారు. విషయ ప్రాధాన్యత వల్ల ప్రశ్నోత్తరాల సమయాన్ని పొడిగించామని ఆయన చెప్పారు.

పార్లమెంటులో మాదిరిగా ఇక్కడ కూడా అంశాలవారీగా కమిటీలు ఏర్పాటు చేసే ఆలోచన ఉన్నట్లు ఆయన తెలిపారు. జీరో అవర్ లో లేవనెత్తిన అంశాలకు త్వరగా సమాధానాలు ఇవ్వాలని తాను ప్రభుత్వానికి సూచించినట్లు ఆయన చెప్పారు. పద్దులు, ద్రవ్య వినిమయ బిల్లుపై చర్చ జరిగి ఉంటే బాగుండేదని ఆయన అన్నారు. వెల్ లోకి సభ్యులు దూసుకు వస్తే సభను నడపకూడదనే సూత్రాన్ని తాను పాటించినట్లు స్పీకర్ తెలిపారు.