సోనియాతో ముగిసిన రోశయ్య భేటీ

హైదరాబాద్: కాంగ్రెసు అధ్యక్షురాలు సోనియా గాంధీతో ముఖ్యమంత్రి రోశయ్య భేటీ ముగిసింది. ఆయన బుధవారం సాయంత్రం సోనియా గాంధీని కలుసుకున్నారు. రాష్ట్ర పరిస్థితిపై, రాజకీయాలపై ఆయన సోనియాతో చర్చించినట్లు సమాచారం. మంత్రివర్గ విస్తరణపై కూడా ఆయన సోనియాతో చర్చించారని అంటున్నారు. అయితే, అందుకు సోనియా సుముఖత వ్యక్తం చేయలేదని తెలుస్తోంది. అయితే, కొద్ది మందినైనా మంత్రివర్గంలోకి తీసుకోవాల్సిన అవసరం ఉందని ఆయన చెప్పినట్లు సమాచారం. దాంతో కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీని కలవాలని ఆమె సూచించినట్లు తెలుస్తోంది.

రోశయ్య బుధవారం రాత్రి వీరప్ప మొయిలీతో సమావేశం కానున్నారు. సోనియాతో భేటీ అనంతరం ఆయన మీడియాతో మాట్లాడకుండానే వెళ్లిపోయారు. వీరప్ప మొయిలీతో భేటీ అనంతరం ఆయన మాట్లాడే అవకాశాలున్నాయి. బుధవారం ఢిల్లీకి చేరుకోగానే మీడియాతో మాట్లాడారు. విస్తరణ అనే ప్రత్యేకమైన ఎజెండాతో తాను రాలేదని ఆయన చెప్పారు. సోనియా ఏది చెప్తే అదే చేస్తానని ఆయన చెప్పారు.