కష్టాల్లో విదేశీ సహాయ మంత్రి థరూర్

న్యూఢిల్లీ: కోచి ఫ్రాంచైజీ వ్యవహారంలో విదేశీ వ్యవహారాల సహాయ మంత్రి శశి థరూర్ కష్టాల్లో పడ్డారు. థరూర్ మెడ చుట్టూ ఉచ్చు బిగుస్తున్న సూచనలు కనిపిస్తున్నాయి. ఈ వ్యవహారంపై ప్రధాని డాక్టర్ మన్మోహన్ సింగ్ వాషింగ్టన్ లో పెదవి విప్పారు. వాస్తవాలు పరిశీలించాక చర్యలు తీసుకుంటామని ఆయన చెప్పారు. థరూర్ వ్యవహారంపై బుధవారం రాత్రి కాంగ్రెసు అధ్యక్షురాలు సోనియా గాంధీ సీనియర్ మంత్రులతో చర్చించారు. ఆ తర్వాత శశి థరూర్ కేంద్ర మంత్రులు ప్రణబ్ ముఖర్జీని, ఎకె ఆంథోనీని కలిశారు.

రాండిపూ కన్సార్టియం వాటాదారులు ఎవరనేది అడగవద్దని థరూర్ తనపై ఒత్తిడి తెచ్చారని ఐపియల్ కమిషనర్ లలిత్ మోడీ ఆరోపించడంతో వివాదం మొదలైంది. ఫ్రాంచైజీ అసలు యజమానులు ఎవరనేది ఇప్పటికీ సందేహమేనని ఆయన అన్నారు. ఫ్రాంచైజీల యజమానుల గురించి తెలుసుకోవాలని బాధ్యత తనపై ఉంటుందని ఆయన అన్నారు. ఫ్రాంచైజీలో పెట్టిన 75 కోట్ల రూపాయలు తనవేనని, తాను థరూర్ కు ప్రతినిధిని కానని సునంద పుష్కర్ వివరణ ఇచ్చుకునే ప్రయత్నం చేశారు. థరూర్ ను బర్తరఫ్ చేయాలని బిజెపి, సిపిఎం, తెలుగుదేశం డిమాండ్ చేస్తున్నాయి. దీంతో శశి థరూర్ తీవ్ర వివాదంలో చిక్కుకున్నారు.