తెలంగాణలో చిరుకు బుద్ధి చెప్తారు: యాష్కీ

హైదరాబాద్ : తెలంగాణలో పర్యటిస్తే సమైక్యాంధ్ర ప్రదేశ్ కావాలని శ్రీకృష్ణ కమిటీకి నివేదిక ఇచ్చిన ప్రజారాజ్యం పార్టీ అధ్యక్షుడు చిరంజీవికి ప్రజలే బుద్ధి చెప్తారని కాంగ్రెసు తెలంగాణ పార్లమెంటు సభ్యుడు మధు యాష్కీ అన్నారు. సమైక్యాంధ్ర ప్రదేశ్ ను సమర్థిస్తూ ప్రజారాజ్యం, సిపిఎం నివేదికలివ్వడం సిగ్గు చేటు అని ఆయన శనివారం మీడియా ప్రతినిధులతో అన్నారు. తెలంగాణ రాష్ట్రం ఏర్పాటు చేస్తే తాము అడ్డుకోబోమని సిపిఎం గతంలో చెప్పి ఇప్పుడు అందుకు విరుద్ధంగా నివేదిక ఇచ్చిందని, దీనికి సిపిఎం పొలిట్ బ్యూరో సభ్యుడు సీతారాం ఏచూరి జవాబు చెప్పాలని ఆయన అన్నారు.

తెలంగాణ ఏర్పడితే హైదరాబాదులో మతకల్లోలాలు చోటు చేసుకుంటాయని సిపిఎం తన నివేదికలో అనడం దిగజారుడుతనమని ఆయన అన్నారు. తమ కాంగ్రెసు పార్టీ తరఫున శ్రీకృష్ణ కమిటీకి ఎందుకు నివేదిక ఇవ్వలేదో ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్, పార్టీ ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ సమాధానం చెప్పాలని ఆయన అన్నారు. పార్టీ శాసనభ్యులు, ఎమ్మెల్సీలు, మంత్రులు, పార్లమెంటు సభ్యులు నివేదికలు ఇచ్చారని, పార్టీ మాత్రం ఇవ్వలేదని ఆయన అన్నారు.