హర్తాల్: ట్రాఫిక్ కు తీవ్ర అంతరాయం

న్యూఢిల్లీ: అధిక ధరలకు వ్యతిరేకంగా 13 ప్రతిపక్ష పార్టీలు నిర్వహిస్తున్న హర్తాల్ దేశవ్యాప్తంగా మంగళవారం ప్రభావం చూపుతోంది. సమాజ్ వాదీ పార్టీ, వామపక్షాలు, తెలుగుదేశం, రాష్ట్రీయ లోక్ దళ్, రాష్ట్రీయ జనతా దళ్, లోకజనశక్తి పార్టీలు మంగళవారం హర్తాల్ కు పిలుపునిచ్చాయి. విమాన సర్వీసులు, రైళ్ల రాకపోకలకు దేశవ్యాప్తంగా పలు ప్రాంతాల్లో అంతరాయం కలిగింది. ఉత్తరప్రదేశ్ రాజధాని లక్నోలో హింసాత్మకంగా మారింది. పశ్చిమ బెంగాల్ లో రైళ్ల రాకపోకలకు, విమాన సర్వీసులకు అంతరాయం ఏర్పడింది.

హుగ్లీ జిల్లాలో గంగాసాగర్ ఎక్స్ ప్రెస్ రైల్లో ప్రయాణికులకు, అందోళనకారులకు మధ్య ఘర్షణ చెలరేగడంతో ఇద్దరు ప్రయాణికులు గాయపడ్డారు. రోడ్డు రవాణాకు కూడా అంతరాయం ఏర్పడింది. వ్యాపార,వాణిజ్య సంస్థలపై కూడా హర్తాల్ ప్రభావం పడిది. కేరళలో రోడ్లు బోసిపోయి కనిపించాయి. పలు చోట్ల ఆందోళనకారులను అదుపు చేసేందుకు పోలీసులు ప్రయత్నించారు. లక్నోలో ఆందోళనకారులు బస్సులకు నిప్పు పెట్టారు. ఆందోళనకారులను పోలీసులు అదుపులోకి తీసుకున్నారు.