మాధురికి 14 రోజుల జ్యుడిష్యల్ కస్టడీ

న్యూఢిల్లీ: పాకిస్తాన్ తరఫున గూఢచర్యం చేస్తున్నట్లు ఆరోపణలు ఎదుర్కుంటున్న భారత దౌత్యాధికారి మాధురి గుప్తాకు కోర్టు శనివారం 14 రోజుల జ్యుడిష్యల్ కస్టడీ విధించింది. పోలీసు కస్టడీ ముగియడంతో ఆమెను శనివారం తీస్ హజారీ కోర్టులో హాజరు పరిచారు. మాధురి గుప్తాకు భారత్ కు సంబంధించిన సున్నితమైన అంశాలను పాకిస్తాన్ కు చేరవేసినట్లు ఆరోపణ ఉంది.

పాకిస్తాన్ లో పనిచేస్తున్న మాధురీ గుప్తాను సంప్రదింపుల పేరుతో భారత్ కు పిలిపించి ఈ వారారంభంలో అరెస్టు చేశారు. విచారణలో ఆమె పలు కీలకాంశాలను వెల్లడించినట్లు సమాచారం. తనకు ఐఎస్ఐ ఏజెంటు రాణా నుంచే కాకుండా జంషేద్ అనే వ్యక్తి నుంచి కూడా సూచనలు అందుతున్నట్లు ఆమె తెలిపింది. ఐఎస్ఐ కోసం ఆమె పని చేస్తున్నట్లు ధ్రువీకరించుకున్న భారత అధికారులు ఆమెను అరెస్టు చేశారు.