వైయస్ జగన్ సాక్షిపై విహెచ్ గరం

హైదరాబాద్: కడప పార్లమెంటు సభ్యుడు వైయస్ జగన్ కు చెందిన సాక్షి దినపత్రికపై కాంగ్రెసు సీనియర్ నేత వి. హనుమంతరావు మండిపడ్డారు. ప్రభుత్వానికి వ్యతిరేకంగా సాక్షి దినపత్రిక వార్తాకథనాలు రాయడాన్ని ఆయన తప్పు పట్టారు. ప్రభుత్వానికి వ్యతిరేకంగా రాయదలుచుకుంటే దివంగత నేత వైయస్ రాజశేఖర రెడ్డి చిత్రాన్ని పత్రికపై నుంచి తొలగించాలని ఆయన శనివారం మీడియా ప్రతినిధుల సమావేశంలో అన్నారు. వైయస్ ఫొటో ఉంటే సాక్షి దినపత్రికను తమ పత్రిక అని కాంగ్రెసువారు అనుకుంటారని, పార్టీ గురించి మంచి మాటలు రాస్తారని భావిస్తారని ఆయన అన్నారు. ప్రభుత్వానికి వ్యతిరేకంగా అన్ని పత్రికలు రాస్తున్నాయి కాబట్టీ మేమూ రాస్తామని సాక్షి యజమానులు అనుకుంటే వారిష్టమని ఆయన అన్నారు.

సంక్షేమ పథకాలకు వైయస్ రాజశేఖర రెడ్డి బతికి ఉన్నా నిధుల కోత తప్పేది కాదని ఆయన అన్నారు. రేషన్ కార్డుల తొలగింపు నిర్ణయాన్ని వైయస్ రాజశేఖర రెడ్డే తీసుకున్నారు కదా అని ఆయన అన్నారు. రాష్ట్రంలోని పరిస్థితులను తమ పార్టీ అధ్యక్షురాలు సోనియా గాంధీ గమనిస్తున్నారని ఆయన అన్నారు. వైయస్ ఏర్పాటు చేసుకున్న మంత్రి వర్గంతోనే ప్రస్తుత ముఖ్యమంత్రి కె. రోశయ్య పని చేస్తున్నారని, ముఖ్యమంత్రి తీసుకునే నిర్ణయాలను వైయస్ అనుయాయులు వ్యతిరేకించాల్సిన అవసరం లేదని ఆయన అన్నారు. మంత్రులు సహకరిస్తున్నారా, లేదా అనేది ముఖ్యమంత్రే చెప్పాలని ఆయన అన్నారు. రాజ్యసభ సీటు కోసమే తాను ముఖ్యమంత్రిని కలిసినట్లు ఆయన తెలిపారు. కేంద్రం ప్రభుత్వం తలపెట్టిన జనగణన కార్యక్రమాన్ని ఆయన హర్షించారు.