తీగ మీద నడుస్తున్నట్లుంది: రోశయ్య

గుంటూరు: ప్రభుత్వ పరిస్థితి తీగ మీద నడస్తున్నట్లుగా ఉందని ముఖ్యమంత్రి రోశయ్య అన్నారు. ఆదివారం గుంటూరులోని చైతన్య గోదావరి గ్రామీణ బ్యాంకు భవనానికి ఆయన శంకుస్థాపన చేశారు. బాలాజీనగర్‌ లో రాజీవ్‌ గృహకల్పలో నిర్మించిన 384 గృహాల సముదాయాలను, మంగళగిరి మండలం చినకాని వద్ద 'హాయ్‌ లాండ్‌'ను రోశయ్య ప్రారంభించారు. ఆయా కార్యక్రమాల్లో మాట్లాడుతూ రాష్ట్ర ప్రభుత్వం అన్ని వర్గాల సంక్షేమానికి కట్టుబడి ఉందని ఉద్ఘాటించారు. వైయస్ ప్రారంభించిన కార్యక్రమాలను కొనసాగిస్తామని ఆయన హామీ ఇచ్చారు.

అనూహ్య పరిస్థితుల్లో తాను ముఖ్యమంత్రిగా బాధ్యతలు స్వీకరించాక ఊహించని వరదలు, వేర్పాటువాద ఉద్యమాలు, హైదరాబాదులో మత ఘర్షణల వంటి పీడకలల్ని అధిగమిస్తూ రాష్ట్రాభివృద్ధికి కృషి చేస్తున్నామన్నారు. వైయస్ ను ఆయన పలు విధాలా కొనియాడారు. పర్యాటక రంగాన్ని ప్రోత్సహించడానికి రాష్ట్ర ప్రభుత్వం తగిన చర్యలు తీసుకుంటుందని రోశయ్య చెప్పారు. అగ్రిగోల్డ్‌ సంస్థ నిర్మించిన హాయ్‌ లాండ్‌ ను సందర్శించడం అద్భుతలోకంలో విహరించినట్లుగా ఉందన్నారు. అన్ని వయసుల వారూ ఆనందించదగ్గ పర్యాటక ప్రాంతమిదని అభివర్ణించారు.