ఇంటికి చేరిన వైయస్ జగన్: ముందు జాగ్రత్తగానే అరెస్టు

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్మోహన్ రెడ్డి శుక్రవారం మధ్యాహ్నం హైదరాబాదులోని తన ఇంటికి చేరుకున్నారు. పోలీసులు జగన్ ను నల్లగొండ జిల్లాలోని వలిగొండలో అరెస్టు చేసి హైదరాబాద్ తీసుకొచ్చారు. ఆయనపై పోలీసులు నల్లగొండ జిల్లాలోని యాదగిరి గుట్టలో కేసు నమోదు చేశారు. హైదరాబాదులోని జగన్ నివాసానికి పెద్ద యెత్తున ఆయన అభిమానులు చేరుకుంటున్నారు. దీంతో జగన్ నివాసం వద్ద భారీ పోలీసు బందోబస్తు ఏర్పాటు చేశారు.

కాగా, ముందు జాగ్రత్త చర్యగానే జగన్ ను అరెస్టు చేశామని పోలీసు డైరెక్టర్ జనరల్ (డిజిపి) గిరీష్ కుమార్ చెప్పారు. ముఖ్యమంత్రి కె. రోశయ్యను కలిసి ఆయన పరిస్థితిని వివరించారు. వరంగల్ జిల్లాలో నెలకొన్న పరిస్థితుల నేపథ్యంలో ముఖ్యమంత్రి కె. రోశయ్య వెంటనే హైదరాబాదు చేరుకుని పరిస్థితిని సమీక్షించారు. మహబూబాబాద్ లో జరిగిన ఘటనలో ఒకరు మాత్రమే మరణించారని రాష్ట్ర హోం మంత్రి సబితా ఇంద్రారెడ్డి చెప్పారు.