కొనసాగుతున్న తెలంగాణ బంద్: అరెస్టులు

హైదరాబాద్‌ : జగన్‌ ఓదార్పుయాత్ర సందర్భంగా వరంగల్‌జిల్లా మహబూబాబాద్‌లో తెలంగాణవాదులపై జరిపిన కాల్పులకు నిరసనగా తలపెట్టిన తెలంగాణ బంద్‌ శనివారం ప్రశాంతంగా కొనసాగుతోంది.తెలంగాణలోని వరంగల్‌, నల్గొండ, ఆదిలాబాద్‌ ,కరీంనగర్‌, మెదక్‌, మహబూబ్‌నగర్‌, నిజామాబాద్‌ జిల్లాల్లో బస్సు డిపోల ఎదుట పొద్దుటనుంచే ఆందోళనకారులు బైఠాయించారు. అక్కడక్కడ చెదురుముదురు సంఘటనలు మినహా ఎలాంటి హింసాత్మకకార్యక్రమాలు చోటు చేసుకోలేదు.

బంద్ కు తెలంగాణ రాష్ట్ర సమితి (తెరాస), బిజెపి, తెలుగుదేశం తెలంగాణ ఫోరం మద్దతిచ్చాయి. మహబూబ్ నగర్, నల్లగొండల నుంచి హైదరాబాద్ వచ్చే బస్సులను ఆందోళనకారులు అడ్డుకున్నారు. తెలంగాణలోని పలు ప్రాంతాల్లో బస్సులు డిపోల్లోనే నిలిచిపోయాయి. నిజామాబాద్, మెదక్, తదితర జిల్లాల్లో బస్సు డిపోల ముందు బైఠాయించిన ఆందోళనకారులను పోలీసులు అరెస్టు చేశారు. వందల సంఖ్యలో ఈ అరెస్టులు జరిగాయి. మెదక్ బస్సు డిపో వద్ద తెరాస నాయకుడు హరీష్ రావు, సిరిసిల్ల డిపో వద్ద మరో నేత కెటి రామారావు బైఠాయించారు.

నిజామాబాద్ జిల్లా బోధన్ లో ఆందోళనకారులు సికింద్రాబాద్ ఎక్స్ ప్రెసును నిలిపేశారు. ఆదిలాబాదు జిల్లా ఖానాపూర్ లో మూడు బస్సుల అద్దాలు ధ్వంసం చేశారు. హైదరాబాదులో బంద్ ప్రభావం పెద్దగా లేదు. మహబూబ్ నగర్ జిల్లాలో బంద్ ప్రభావం కాస్తా తక్కువగా ఉంది. వరంగల్ జిల్లాలో బంద్ ప్రభావం ఎక్కువగా కనిపించింది. మహబూబాబాద్ లో సంపూర్ణంగా బంద్ జరుగుతోంది.