వైయస్ పథకాలపై మళ్ళీ ఆలోచించాల్సిందే: జెసి

కడప: వైయస్ హయాంలో ప్రారంభమైన సంక్షేమ పథకాలను తీవ్రంగా వ్యతిరేకిస్తున్న సీనియర కాంగ్రెస్ నాయకుడూ జెసి దివాకర్ రెడ్డి ఈ విషయంలో మళ్ళీ నోరు విప్పారు. రాష్ట్రంలోని సంక్షేమ పథకాలను సమీక్షించాలని కాంగ్రెస్‌ నేత జేసీ దివాకర్‌ రెడ్డి పునరుద్ఘాటించారు. వైయస్‌ ఉన్నప్పుడే దీనిపై చర్చించానని ఆయన తెలిపారు. చిరంజీవితో చర్చలు జరపమని వైయస్‌ సూచించారని, ఇప్పుడు సోనియా గాంధీ కూడా అదే పనిచేసారని ఆయన అన్నారు. మారుతున్న కాలానికి అనుగుణంగా పథకాలను సమీక్షించాలని ఆయన అన్నారు.

రోశయ్య కేబినెట్ లో చేరడానికి జెసి దివాకర్ రెడ్డి తహతహలాడుతున్న విషయం తెలిసిందే. రోశయ్య శిబిరంలో ఇప్పుడు దివాకర్ రెడ్డి ప్రముఖ వ్యక్తి. మరో రెండు నెలల్లో జరుగనున్న మంత్రివర్గ విస్తరణలో జెసి దివాకర్ రెడ్డి, మర్రి శశిధర్ రెడ్డి, డిఎల్ రవీంద్రారెడ్డిలకు స్ధానం లభించడం దాదాపు ఖాయమైనట్టే.