సీమాంధ్ర నేతలపై మాజీ మంత్రి జీవన్ రెడ్డి ఎదురు దాడి

హైదరాబాద్: తమ పార్టీ సీమాంధ్ర నేతలపై మాజీ మంత్రి, కాంగ్రెసు సీనియర్ నేత టి. జీవన్ రెడ్డి శుక్రవారం మీడియా ప్రతినిధుల సమావేశంలో విరుచుకు పడ్డారు. తెలంగాణ ఉప ఎన్నికల్లో తెలంగాణ ఎజెండాపై పార్టీ పోటీ చేయకూడదని సీమాంధ్ర నేతలు చేసిన ప్రకటనలను ఆయన వ్యతిరేకించారు. తెలంగాణ ఎన్నికల్లో తెలంగాణపై కాకుండా మరో అంశంతో ఎలా పోటీ చేస్తున్నారని ఆయన అన్నారు.

తెలంగాణ ప్రజలు ప్రత్యేక రాష్ట్రాన్ని కోరుకుంటున్నారని, ప్రజల ఆకాంక్షలకు భిన్నంగా సీమాంధ్ర నాయకులు వ్యవహరిస్తున్నారని, తెలంగాణ రాష్ట్రాన్ని వ్యతిరేకిస్తున్నారని ఆయన విమర్శించారు. తెలంగాణ ఎన్నికలపై సీమాంధ్ర నేతలు చేస్తున్న ప్రకటనలు వారి రాజకీయ ఆధిపత్య ధోరణికి నిదర్శనమని ఆయన అన్నారు.