కదిరి డబ్బులపై టిడిపి సమాధానం చెప్పాల్సిందే: చిరంజీవి

హైదరాబాద్‌: అనంతపురం జిల్లా కదిరిలో పట్టుబడిన రూ.7 కోట్ల వ్యవహారంపై తెలుగుదేశం నాయకులే సమాధానం చెప్పాలని ప్రజారాజ్యం పార్టీ అధ్యక్షుడు చిరంజీవి వ్యాఖ్యానించారు. పార్టీ కార్యాలయంలో శుక్రవారం మంచిర్యాల రోడ్డు ప్రమాద బాధితుల కుటుంబాలకు ఆర్థిక సాయం అందించిన తర్వాత ఆయన విలేకరులతో మాట్లాడారు. కదిరి ఘటన గురించి ప్రస్తావించగా చట్టం తన పని తాను చేసుకుపోతుందని ఆయన అన్నారు.

మంచిర్యాల సమీపంలో గత నెలాఖరులో జరిగిన రోడ్డు ప్రమాదంలో మృతి చెందిన వారి కుటుంబాలను పరామర్శించేందుకు స్వయంగా వెళ్దామనుకున్నా అక్కడికి వెళ్లలేని స్థితి నెలకొనడం దురదృష్టకరమని చిరంజీవి అన్నారు. ప్రమాదంలో మరణించిన 36 మంది కుటుంబాలకు చెందినవారిని పార్టీ నేతలు శుక్రవారం ప్రరాపా కార్యాలయానికి తీసుకొచ్చారు. చిరంజీవి వారికి రూ.10వేల చొప్పున ఆర్థిక సాయం అందజేశారు.మృతుల కుటుంబాలకు ఆపద్బంధు పథకాన్ని అమలు చేయటంతోపాటు రూ.5 లక్షల చొప్పున ప్రభుత్వం ఇవ్వాలని డిమాండ్‌ చేశారు.