వైయస్ రాజశేఖర రెడ్డి దేవుడు, నేను రాక్షుడ్నా: సిఎం రోశయ్య

హైదరాబాద్: "వైయస్ వరాలిచ్చే దేవుడైతే, నేను విద్యార్థుల ఫీజులను ఆపే రాక్షసుడిలా కనిపిస్తున్నానా? ఈ విషయలో వాస్తవాలేంటో మీకు తెలియదా" అంటూ ముఖ్యమంత్రి కె. రోశయ్య మంత్రులు, అధికారులపై మండిపడ్డారు. ఎస్సీ, ఎస్టీ, బీసీ విద్యార్థుల ఫీజులు, స్కాలర్‌షిప్‌లపై మంత్రుల ఉపసంఘంతో సోమవారం తన కార్యాలయంలో ఆయన సమీక్షించారు. వైయస్ పథకాలను ఆపాల్సిన అవసరం, ఉద్దేశం తనకు లేదన్నారు. ఏవైనా ఇబ్బందులుంటే నిధులు సర్దుబాటు చేస్తామే తప్ప ఏ కార్యక్రమాన్నీ ఆపబోమని ఆయన స్పష్టం చేశారు. "ఫీజుల విషయంలో వాస్తవాలేంటో మీకు తెలియదా? గత కొన్నేళ్లుగా ట్యూషన్ ఫీజుల బకాయిలున్నాయి. 2008 నుంచి పేరుకుపోతున్నాయి. వీటిని వచ్చే సంవత్సరం క్లియర్ చేస్తున్నాం. ఈ వాస్తవాలను మీరెందుకు బయటకు చెప్పట్లేదు" అని మంత్రులపై మండిపడ్డారు. "నేను సీఎం అయ్యాకనే ఫీజులు ఆపుతున్నట్లుగా ప్రచారం జరుగుతుంటే వాస్తవాలు తెలిసిన మీరెందుకు ఖండించడం లేదు" అని ఆయన మంత్రులు, అధికారులతో అన్నారు.

వాస్తవాలను, ఫీజులు ఇవ్వడంలో ఉన్న ఇబ్బందులను నా దృష్టికి ఎందుకు తీసుకురావడం లేదు? 2008 నుంచి బకాయిలను తర్వాతి సంవత్సరంలో చెల్లిస్తున్నాం. అయినా నేను సీఎం అయ్యాకే ఆగిపోయాయన్నట్లుగా, పేదల వ్యతిరేకిగా ప్రచారం జరుగుతున్నా, మీరెందుకు వాస్తవాలను ప్రజలకు చెప్పట్లేదని ఆయన అడిగారు. ఫీజులను చెల్లించడంలో ఉన్న ఇబ్బందులను నా దృష్టికి ఎందుకు తీసుకురావడం లేదని ప్రశ్నించారు. అవసరానికి తగినంత బడ్జెట్ లేదని ఓ మంత్రి చెప్పగా, "ఆ విషయాన్ని నా దృష్టికి ఎందుకు తేలేదు? ఇది ఎవరి తప్పు" అని గట్టిగా ప్రశ్నించారు. "ఏదైనా ఇబ్బంది ఉంటే నా దృష్టికి తీసుకురండి, చర్చించి పరిష్కరిస్తానని చెప్పారు. అందరూ కలిసి నన్ను బీసీ వ్యతిరేకిని చేశారు కదా అంటూ సమావేశ ఆరంభంలోనే సీఎం మధనపడ్డారు. "నేను బీసీ వ్యతిరేకినంటూ ఆర్.కృష్ణయ్య, మరికొందరు మాట్లాడుతుంటే మీరు(మంత్రులు) నిజాలు ఎందుకు చెప్పలేదు? ఇంత రాద్ధాంతం జరుగుతుంటే ప్రభుత్వం తరఫున మీలో ఎవరైనా మాట్లాడారా? నిజాలేంటో ప్రజలకు చెప్పండి" అని మంత్రులను కోరారు.