చంద్రబాబు నాయుడు ఆదేశాల మేరకే నడుచుకుంటా: హరికృష్ణ

గుంటూరు: కాంగ్రెసు పాలనపై పోరాటంలో నందమూరి కుటుంబ సభ్యులంతా తమ పార్టీ అధినేత చంద్రబాబు ఆదేశాల మేరకే నడుచుకుంటామని తెలుగుదేశం రాజ్యసభ సభ్యుడు హరికృష్ణ స్పష్టం చేశారు. దుష్ట కాంగ్రెసు పాలనను పారదోలేందుకు అన్నగారి కుటుంబంగా తామంతా తమ పార్టీ అధినేత ఆదేశాలకు అనుగుణంగా ముందుకు వెళ్తున్నామని ఆయన బుధవారం చెప్పారు.

కేంద్ర, రాష్ట్ర ప్రభుత్వాలపై ఆయన తీవ్రంగా ధ్వజమెత్తారు. గతంలో ఎన్నడూ లేనంతగా కేంద్ర ప్రభుత్వం వంటగ్యాస్‌, కిరోసిన్‌, పెట్రో ధరలను అమాంతంగా పెంచి ప్రజల రక్తాన్ని పీల్చి పిప్పి చేస్తోందని ఆయన విమర్శించారు. రాష్ట్ర ప్రభుత్వం రైతుల కడుపులు కొడుతోందని, ఏ పంటకూ గిట్టుబాటు ధర లేదని దుయ్యబట్టారు. వీధివీధిలోనూ మద్యాన్ని ఏరులై పారిస్తున్నారని అన్నారు.