బాబ్లీ అఖిల పక్ష సమావేశానికి చంద్రబాబు డుమ్మా

హైదరాబాద్: బాబ్లీ ప్రాజెక్టుపై ముఖ్యమంత్రి కె. రోశయ్య ఏర్పాటు చేస్తున్న అఖిల పక్ష సమావేశానికి నారా చంద్రబాబు నాయుడు డుమ్మా కొడుతున్నారు. ఈ నెల 26వ తేదీన ప్రధాని డాక్టర్ మన్మోహన్ సింగ్ ముందు వినిపించాల్సిన వాదనను ఖరారు చేయడానికి ముఖ్యమంత్రి శుక్రవారం అఖిల పక్ష సమావేశం ఏర్పాటు చేశారు. బాబ్లీ ప్రాజెక్టుపై తన బృందాన్ని మహారాష్ట్రకు తీసుకుని వెళ్లి నానా హంగామా చేసిన చంద్రబాబు అఖిల పక్ష సమావేశానికి హాజరు కాకపోవడం చర్చనీయాంశంగా మారింది.

రోశయ్యతో జరిగే అఖిలపక్ష సమావేశానికి చంద్రబాబు తమ పార్టీకి చెందిన నలుగురు నాయకులను పంపుతున్నారు. ఈ నెల 26వ తేదీన ప్రధానితో జరిగే అఖిల పక్ష బృందంలో మాత్రం చంద్రబాబు ఉంటారు. ఇందుకు గాను చంద్రబాబు ఈ నెల 25వ తేదీ సాయంత్రం ఢిల్లీ వెళ్తున్నారు. బాబ్లీకి వ్యతిరేకంగా జాతీయ పార్టీల నాయకులను కూడగట్టేందుకు ఆయన ఈ సందర్భంగా ప్రయత్నాలు చేసే అవకాశం ఉంది.