కేంద్ర మంత్రి పళ్లంరాజు మెడుకు కీచక టీచర్ వివాదం

హైదరాబాద్‌: హైదరాబాద్‌ సమీపంలోని పార్క్‌వుడ్‌ ఇంటర్‌నేషనల్‌ స్కూల్‌పై వెల్లువెత్తిన వేధింపులు, అత్యాచారాల ఆరోపణలు కూడా కేంద్ర మంత్రి పళ్ళంరాజు మెడకు చుట్టుకుంటున్నాయని ఆంధ్రప్రభ తెలుగు దిన పత్రిక ఓ వార్తా కథనాన్ని ప్రచురించింది. ఈ వార్తాథనం వివారాలు ఇలా ఉన్నాయి - ఈ పాఠశాలలో తమ పిల్లల్ని చదివిస్తున్న ఢిల్లీకి చెందిన పలువురు ఉన్నతాధికారులు, కాంగ్రెస్‌పార్టీ నాయకులు ఈ విషయాన్ని ఇప్పటికే కాంగ్రెసు పార్టీ దృష్టికి తీసుకెళ్ళారు. ఈ పాఠశాల డైరెక్టర్‌ అయూబ్‌ఖాన్‌ ఒక విద్యార్ధినిపై అత్యాచారానికి పాల్పడ్డాడన్న విషయం వెలుగుచూసింది. దీనిపై విద్యార్ధిని తల్లిదండ్రులు హైదరాబాద్‌ సిసిఎస్‌లో కేసు పెట్టారు. దీన్ని మానవహక్కుల సంఘం కూడా తీవ్రంగా పరిగణించింది.

పార్క్‌వుడ్‌ ఇంటర్‌నేషనల్‌ స్కూల్‌కు పళ్ళంరాజు దీర్ఘకాలం పాటు డైరెక్టర్‌గా వ్యవహరించినట్లు తెలుస్తోంది. పళ్ళంరాజు సహచరులు, హైదరాబాద్‌ పబ్లిక్‌ స్కూల్‌ సహవిద్యార్ధుల పెట్టుబడులతోనే ఈ స్కూల్‌ ఏర్పాటు చేసినట్లు సమాచారం. మంత్రైన తర్వాత పళ్ళంరాజు తన సన్నిహితుడైన అయూబ్‌ఖాన్‌కు డైరెక్టర్‌ పదవినప్పగించినట్లు తెలుస్తోంది. ఈ స్కూల్‌లో జరిగే ప్రతి కార్యక్రమంలో పళ్ళంరాజు విధిగా పాల్గొంటారు. రెండువారాల క్రితమే కుటుంబ సభ్యులతో సహా స్కూల్‌కెళ్ళి పరిశీలించారు. తరచూ కేంద్రమంత్రి పళ్ళంరాజు ఇక్కడకొస్తుండడంతోనే లక్షలు చెల్లించి తమ పిల్లల్ని ఈ పాఠశాలలో చేర్చినట్లు తల్లిదండ్రులు వెల్లడిస్తున్నారు.

తూర్పు గోదావరి జిల్లాలో కడప పార్లమెంటు సభ్యుడు వైయస్ జగన్ ఓదార్పు యాత్రకు పళ్లంరాజు సహకరించారని, దాంతో పార్టీ అధిష్టానం పళ్లంరాజుపై ఓ కన్నేసి ఉంచిందని ఆంధ్రప్రభ తన వార్తాకథనంలో తెలిపింది.