తమిళనాడులో ఫకీర్ చిన్నారిని నరికి, నెత్తురు తాగాడు

మధురై: తమిళనాడులో పాపను బలి ఇచ్చిన సంఘటన వెలుగు చూసింది. ఓ ఫకీర్ ఏడాదిన్నర వయస్సు గల పాపను అపహరించి, బలిచ్చి, ఆ పాప శరీరావయవాలను రెండు వేర్వేరు చోట్ల పాతిపెట్టాడు. అతీత శక్తులను పొందడానికి అతను ఈ పని చేసినట్లు పోలీసులు చెబుతున్నారు. అతను పాప రక్తం సేవించినట్లు కూడా పోలీసులు అనుమానిస్తున్నారు. ఫకీర్ తో పాటు ఈ సంఘటనలో పాలు పంచుకున్న మహిళను పోలీసులు అరెస్టు చేశారు. పాప అవయవాలను రామనాథపురం జిల్లాలోని ఓ దర్గా వద్ద, తలను థూత్ కుడి జిల్లా కల్లమోజి వద్ద పోలీసులు కనిపెట్టారు. అబ్దుల్ గఫూర్ అనే ఫకీర్ కాళి అమ్మన్ అనే దేవతను ప్రసన్నం చేసుకోవడానికి ఈ బలికి ఒడిగట్టినట్లు పోలీసులు చెబుతున్నారు.

జి ఖాదర్ యూసుఫ్ అనే చిన్నారి బాలుడిని ఫకీర్ మదురైలోని గొరిపాలాయం దర్గా నుంచి జులై 2వ తేదీన కిడ్నాప్ చేశాడు. విధవరాలైన షెరీనా ఫాతిమా ఆ బాలుడితో దర్గాలోనే కాపురం ఉంటోంది. తన సహచరురాలు రమాలా బీవీకి చికిత్స అందించడానికి వెళ్లినప్పుడు ఫకీర్ ఆ బాలుడిని చూశాడు. గఫూర్, రమాలా బీవీ ఆ చిన్నారిని రామనాథపురంలోని లాడ్జికి తీసికెళ్లారు. చిన్నారి ఏడ్పు లంకించుకోవడంతో ఫకీర్ అతని గొంతు విరిచాడు. ఆ తర్వాత బాలుడిని నరికి తలను ఏర్వాడి దర్గా వద్ద కుట్టుపల్లివసల్ లో పూడ్చిపెట్టాడు. గఫూర్ ను పోలీసులు శుక్రవారం అరెస్టు చేసి మదురైకి తెచ్చారు. అతను చూపిన వివరాల ప్రకారం తవ్వకాలు జరిపి చిన్నారి శరీరావయవాలను పోలీసులు వెలికి తీశారు.