టిడిపి తెలంగాణ ద్రోహుల పార్టీ: ఈటెల రాజేందర్

హైదరాబాద్‌: తెలుగుదేశం పార్టీ (టిడిపి)ని తెలంగాణ రాష్ట్ర సమితి (తెరాస) శాసనసభా పక్ష నాయకుడు ఈటెల రాజేందర్ తెలంగాణ ద్రోహుల పార్టీగా అభివర్ణించారు. తెలంగాణ ఉప ఎన్నికల్లో గెలిచిన 11 మంది తెరాస సభ్యులు, ఒక బిజెపి సభ్యుడు సోమవారం శాసనసభ్యులుగా సోమవారం ప్రమాణ స్వీకారం చేశారు. ఈ సందర్భంగా ఈటెల రాజేందర్ మీడియాతో మాట్లాడారు. కాంగ్రెసు, తెలుగుదేశం పార్టీలు మద్యం, డబ్బులు పంపిణీ చేసినా ప్రజలు లొంగిపోలేదని ఆయన అన్నారు. తెలంగాణ ఆత్మగౌరవాన్ని తెలంగాణ ప్రజలు ఎగురేశారని ఆయన అన్నారు. ఈ గెలుపు తెలంగాణ ఆత్మగౌరవ ప్రకటన అని ఆయన అన్నారు.

కాంగ్రెసు, తెలుగుదేశం పార్టీలు తమ నేత కెసిఆర్ పై, తెరాసపై విమర్శలు మానుకుని ఆత్మవిమర్శ చేసుకోవాలని తెలంగాణ రాష్ట్ర సమితి శాసనసభా పక్షం ఉప నాయకుడు హరీష్ రావు అన్నారు. తమపై విమర్శలు మానుకోకపోతే కాంగ్రెసు, తెలుగుదేశం పార్టీల ఉనికికే ప్రమాదం వాటిల్లుతుందని ఆయన అన్నారు. ప్రమాణ స్వీకారానికి ముందు 12 మంది కూడా గన్ పార్కు వద్ద తెలంగాణ అమరవీరులకు నివాళులు అర్పించారు.