తెలంగాణ కోసం మరో యువకుడి బలిదానం

వరంగల్: తెలంగాణ రాష్ట్ర ఏర్పాటు కోసం మరో యువకుడు బలిదానం చేసుకున్నాడు. వరంగల్ జిల్లా డోర్నకల్ మండలం ఉయ్యాలవాడ గ్రామ శివారులోని సత్యతండాలో బానోతు కిషన్ నాయక్ అనే 22 ఏళ్ల యువకుడు తెలంగాణ కోసం ఆత్మహత్య చేసుకున్నాడు. పురుగుల మందు తాగి అతను మంగళవారం ఉదయం ఆత్మహత్యకు ఒడిగట్టాడు. అతను ఓ సూసైడ్ నోట్ రాసి పెట్టాడు. వెంటనే తెలంగాణ రాష్ట్రం ఏర్పాటు చేయాలని అతను ఆ సూసైడ్ నోటులో కోరాడు.

కిషన్ నాయక్ సిద్దిపేట నియోజకవర్గంలో తెలంగాణ రాష్ట్ర సమితి (తెరాస) అభ్యర్థి హరీష్ రావు కోసం ప్రచారం కూడా చేశాడు. ఇందుకు సంబంధించిన ఫొటోలు ఉన్నాయి. తెలుగుదేశం నాయకులు నాగం జనార్దన్ రెడ్డి, రేవూరి ప్రకాష్ రెడ్డి, సత్యవతి రాథోడ్, ఎర్రబెల్లి దయాకర రావులను అతను తన సూసైడ్ నోటులో తెలంగాణ ద్రోహులుగా అభివర్ణించాడు.