సిఎం రోశయ్య బాబ్లీపై ఉత్త చేతులతో వచ్చారు: చంద్రబాబు

హైదరాబాద్: బాబ్లీ ప్రాజెక్టుపై ముఖ్యమంత్రుల సమావేశానికి వెళ్లి మన ముఖ్యమంత్రి కె. రోశయ్య ఉత్త చేతులతో తిరిగి వచ్చారని తెలుగుదేశం పార్టీ అధ్యక్షుడు నారా చంద్రబాబు నాయుడు విమర్శించారు. బాబ్లీ ముమ్మాటికీ అక్రమ ప్రాజెక్టేనని ఆయన మంగళవారం మీడియా ప్రతినిధుల సమావేశంలో అన్నారు. ప్రధాని డాక్టర్ మన్మోహన్ సింగ్ సమక్షంలో జరిగిన ముఖ్యమంత్రుల సమావేశంలో రోశయ్య రాష్ట్ర హక్కులను తాకట్టు పెట్టారన్నారు.

బాబ్లీ విషయంలో మహారాష్ట్ర ప్రభుత్వం అబద్ధాలు చెప్పిందని విమర్శించారు. తప్పు చేస్తున్నామని మహారాష్ట్రకు అర్థమైందని అన్నారు. బాబ్లీ ప్రాజెక్టు విషయంలో కేంద్ర ప్రభుత్వం మన రాష్ట్రానికి అన్యాయం చేస్తోందని ఆయన అన్నారు. మహారాష్ట్ర ప్రభుత్వం నిర్మిస్తున్న బాబ్లీ ప్రాజెక్టు అక్రమమని చెబుతూ గత కేంద్ర జలవనరుల శాఖ మంత్రి సైఫుద్దీన్ సోజ్ మహారాష్ట్రకు రాసిన లేఖను చంద్రబాబు మీడియా ప్రతినిధుల సమావేశంలో విడుదల చేశారు. బాబ్లీకి వ్యతిరేకంగా తాము నిరంతర పోరాటం చేస్తామని ఆయన చెప్పారు.