చిరుపై విమర్శలకు జీవిత రాజశేఖర్ లకు కాపునాడు హెచ్చరిక

హైదరాబాద్: ప్రజారాజ్యం పార్టీ అధినేత చిరంజీవిపై సినీజంట రాజశేఖర్-జీవిత చేసిన వ్యాఖ్యలను రాష్ట్ర కాపునాడు రాజకీయ కార్యాచరణ కమిటీ ఖండించింది. చిరుపై అవాకులు-చవాకులు పేలొద్దు, వళ్లు దగ్గరపెట్టుకోమని కమిటీ కన్వీనర్ పీఎల్వీ ప్రసాదరావు సోమవారం విడుదల చేసిన ప్రకటనలో హెచ్చరించారు. నెల్లూరు జిల్లా కావలిలో చిరంజీవి చేసిన వ్యాఖ్యలను సమర్థిస్తున్నట్టు ఆయన తెలియజేశారు.

'యువనేత ఓదార్పు యాత్రకు ఓర్పు, నేర్పు లేదు. కాంగ్రెస్ పార్టీ ద్వారా పదవులు పొంది స్థాయిని పెంచుకుని నాయకత్వం వహించారు. దానిని అడ్డుపెట్టుకుని ఏ వ్యాపారాలూ లేకుండానే అనతికాలంలో కోట్లు గడించారు. ఆ ధనంతో కేంద్ర, రాష్ట్ర అధినేతలను ధిక్కరించే అరాచక రాజకీయం చేసే ఏ స్థాయి నాయకుడైనా క్షమార్హుడు కాదు. అటువంటి వారిని సమర్థించే వారంతా అవకాశవాదులు' అని ప్రసాదరావు అన్నారు.జగన్ కొమ్ముకాస్తూ కుల పరువును బజారుపాలు చేసిన వారు కూడా క్షమార్హులు కాదన్నారు. ప్రజాసంక్షేమం దృష్ట్యా కాంగ్రెస్ పార్టీకి మద్దతిస్తానని చిరంజీవి ప్రకటించారని పీఎల్వీ పేర్కొన్నారు.