తెలంగాణ, సీమాంధ్ర ఎంపీల మధ్య సయోధ్యకు మొయిలీ

న్యూఢిల్లీ: పార్టీ సీమాంధ్ర, తెలంగాణ పార్లమెంటు సభ్యుల మధ్య సయోధ్యకు కాంగ్రెసు ఆంధ్రప్రదేశ్ వ్యవహారాల ఇంచార్జీ, కేంద్ర మంత్రి వీరప్ప మొయిలీ ప్రయత్నాలు ప్రారంభించారు. ఇందుకు గాను ఆయన ఈ నెల 18వ తేదీ సాయంత్రం రాష్ట్ర పార్లమెంటు సభ్యులకు విందు ఇస్తున్నారు. ఈ విందుకు ఇరు ప్రాంతాల పార్లమెంటు సభ్యులు కూడా హాజరయ్యే అవకాశం ఉంది. అయితే, ఇరు ప్రాంతాల పార్లమెంటు సభ్యుల మధ్య సయోధ్య సాధ్యమవుతుందా అనేది ప్రశ్నార్థకమే. ఈ విందుకు కడప పార్లమెంటు సభ్యుడు జగన్ హాజరవుతారా అనేది చర్చనీయాంశంగా మారింది.

తెలంగాణ రాష్ట్ర ఏర్పాటుకు ప్రక్రియను ప్రారంభిస్తున్నామని కేంద్ర హోం మంత్రి పి. చిదంబరం ప్రకటించిన తర్వాత కాంగ్రెసులోని ఇరు ప్రాంతాల పార్లమెంటు సభ్యుల మధ్య తీవ్ర విభేదాలు చోటు చేసుకున్నారు. పరస్పరం పలకరించుకునే పరిస్థితి కూడా లేదు. ఇరు ప్రాంతాల ఎంపీలు ఎవరికి వారే తమ తమ వాదనలతో ముందుకు సాగుతున్నారు. దీంతో సయోధ్య కోసం మొయిలీ ముందుకు వచ్చినట్లు తెలుస్తోంది.