కె చంద్రశేఖర రావును ఆకాశానికెత్తిన బొత్స సత్యనారాయణ

హైదరాబాద్‌: తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావును సీమాంధ్రకు చెందిన రాష్ట్ర మంత్రి బొత్స సత్యనారాయణ ఆకాశానికెత్తారు. ప్రశంసలతో ముంచెత్తారు. ఉద్యమం పట్ల కేసీఆర్‌కు ఉన్న చిత్తశుద్ధిని, కెసిఆర్ జరిపిన కృషినీ తాను శంకించడం లేదని బొత్స మంగళవారం మీడియా ప్రతినిధుల చెప్పారు. ఆశయ సాధన కోసం కేసీఆర్‌ కేంద్రమంత్రి పదవులనే తృణప్రాయంగా త్యజించారని గుర్తు చేశారు. దీనిపై తనకు ఎటువంటి దురాభిప్రాయం కానీ, దురుద్దేశం కానీ లేవన్నారు. తెలంగాణ, సీమాంధ్ర నేతలు మాట్లాడేటప్పుడు సంయమనం పాటించాలని ఆయన విజ్ఞప్తి చేశారు. ఒకరు దేశద్రోహం అంటే మరొకరు అంతర్యుద్ధంఅని ఇంకొకరు మిలిటెంట్‌ పోరాటం అంటూ వ్యాఖ్యలు చేసే ముందు పదికోట్ల తెలుగు ప్రజల మనోభావాలను దృష్టిలో ఉంచుకోవాలన్నారు. వెనుకబడిన ప్రాంతానికి చెందిన తాను ఇటీవల చోటుచేసుకున్న పరిణామాలపై పదిరోజుల నుంచి తీవ్రంగా కలత చెందానని బొత్స తెలిపారు.

హితబోధ చేస్తున్నానని అనుకోవద్దని, తాను చొరవ చూపుతున్నందుకు క్షమించాలని కోరారు. మంత్రులను ఉద్దేశించి మాత్రమే విజ్ఞప్తి చేయడం లేదని ప్రజాప్రతినిధులు, ప్రజాప్రతినిధులుకాని వారిని సైతం సంయమనం పాటించాల్సిందిగా కోరుతున్నట్లు చెప్పారు. పరుష పదజాలానికి అందరూ దూరంగా ఉండాలని, ఎవరు ముందు అన్నారు ఎవరు తరువాత అన్నారు అనేది ముఖ్యం కాదని చెప్పారు. కోర్టు వరకు వెళ్లడం మంచి సంప్రదాయం కాదన్నారు. శ్రీకృష్ణ కమిటీపై అన్ని పార్టీల్లోనూ విశ్వసనీయత నెలకొందన్నారు. కమిటీ నివేదికను అనుసరించి కేంద్రం రాష్ట్రవిభజనకు నిర్ణయించినా, సమ్యైక్యాంధ్రకే కట్టుబడినా ఆ నిర్ణయాన్ని అందరం పాటిద్దామన్నారు. సమ్యైక్యాంధ్ర కోసం కూడా కొంతమంది శాసనసభ్యులు రాజీనామాలు చేశారన్నారు. మంత్రుల్లో ప్రాంతీయ విభజన వచ్చిందా అన్న ప్రశ్నకు అలాంటిదేమీ లేదని తాము రాష్ట్రానికి మంత్రులమని ఆయన అన్నారు. ఒక ప్రాంతానికి చెందిన మంత్రులు మరో ప్రాంతానికి వెళ్లటం లేదన్నది వాస్తవం కాదన్నారు.