వీరప్ప మొయిలీ విందుకు వైయస్ జగన్ వెళ్తారా?

హైదరాబాద్: కాంగ్రెసు ఆంధ్రప్రదేశ్ వ్యవహారాల ఇంచార్జీ వీరప్ప మొయిలీ ఇస్తున్న విందుకు వైయస్ జగన్ హాజరవుతారా, లేదా అనేది ఆసక్తికరంగా మారింది. తాజా రాజకీయ పరిణామాల నేపథ్యంలో జగన్ నిర్ణయం ఎలా ఉంటుందనే ఉత్కంఠ నెలకొంది. రాష్టానికి చెందిన పార్లమెంటు సభ్యులకు గురువారం రాత్రి వీరప్ప మొయిలీ విందు ఇస్తున్నారు. సన్నిహితుల సలహా మేరకు ఆ విందుకు హాజరు కావాలని జగన్ నిర్ణయించుకున్నట్లు వార్తలు వెలువడుతున్నాయి. విందుకు రాకపోతే పార్టీలో తప్పుడు సంకేతాలు వెళ్లే ప్రమాదమున్నందున తప్పకుండా పాల్గొనాలని కొంత మంది పార్లమెంటు సభ్యులు సూచించినట్లు సమాచారం. దాంతో ఆయన మనసు మార్చుకున్నట్లు చెబుతున్నారు.

విందును తప్పించుకునేందుకు జగన్ఈ నెల 20, 21 తేదీల్లో పులివెందుల నియోజక వర్గంలో ఓదార్పు యాత్రకు షెడ్యూల్‌ ఖరారు చేసుకున్నారని చెబుతున్నారు. అయితే శ్రేయోభిలాషుల సూచనతో నిర్ణయం మార్చుకున్నట్లు తెలిసింది. ఓదార్పు యాత్రకు ఎవ్వరూ వెళ్లొద్దని అధిష్ఠానం ప్రకాశం జిల్లా పార్లమెంటుసభ్యులకు కచ్చితంగా చెప్పిన నేపథ్యంలో పరిస్థితులు మరింత దిగజారకుండా ఉండేందుకు జగన్‌ ఈ విందుకు హాజరు కావాలని నిర్ణయించుకున్నట్లు తెలుస్తోంది.