ధిక్కారానికే మంత్రి బాలినేని నిర్ణయం: ఓదార్పుకు రెడీ

హైదరాబాద్: కాంగ్రెసు కడప పార్లమెంటు సభ్యుడు వైయస్ జగన్ ఓదార్పు యాత్ర విషయంలో అధిష్టానాన్ని ధిక్కరించడానికే రాష్ట్ర గనుల శాఖ మంత్రి బాలినేని శ్రీనివాస్ రెడ్డి నిర్ణయించుకున్నారు. వచ్చే నెల 3వ తేదీ నుంచి ప్రకాశం జిల్లాలో జరిగే జగన్ ఓదార్పు యాత్రకు ఆయన ఏర్పాట్లు చేస్తున్నారు. ముఖ్యమంత్రి కె. రోశయ్య ఫోన్ చేసి ఓదార్పు యాత్రలో పాల్గొనవద్దని చెప్పిన విషయాన్ని ఆయన ధృవీకరించారు.

దివంగత నేత వైయస్ కుటుంబంతో తనకు ఉన్న అనుబంధం ప్రత్యేకమని, వైయస్ కుటుంబంతో తనకు బంధుత్వం ఉందని తాను రోశయ్యతో చెప్పినట్లు బాలినేని గురువారం మీడియా ప్రతినిధులతో చెప్పారు. తాను ఓదార్పు యాత్రలో పాల్గొంటానని ఆయన చెప్పారు. భవిష్యత్తు ఎలా ఉంటుందో చెప్పలేనని ఆయన అన్నారు.