రాహుల్ గాంధీ మైనింగ్ పై ఎందుకు మాట్లాడరు: చంద్రబాబు నాయుడు

హైదరాబాద్: రాష్ట్రంలోని మైనింగ్ మాఫియాపై కాంగ్రెసు ప్రధాన కార్యదర్సి, పార్లమెంటు సభ్యుడు రాహుల్ గాంధీ ఎందుకు మాట్లాడడం లేదని తెలుగుదేశం పార్టీ అధ్యక్షుడు నారా చంద్రబాబు నాయుడు ప్రశ్నించారు. అక్రమ ఖనిజ తవ్వకాల ద్వారా రాష్టాన్ని దోచుకుంటున్నవారితో రాహుల్ ఎందుకు లాలూచీ పడుతున్నారో అర్థం కావడం లేదని ఆయన శుక్రవారం మీడియా ప్రతినిధుల సమావేశంలో అన్నారు. మైనింగ్ మాఫియాపై కర్నాటకలో కాంగ్రెసు చేస్తున్న పోరాటాన్ని రాహుల్ అభినందించారని, ఆంధ్రప్రదేశ్ లోని మైనింగ్ మాఫియాపై మాట్లడడం లేదని ఆయన అన్నారు.

గనులు తవ్వి ఇష్టానుసారంగా ఎగుమతి చేస్తూ అక్రమంగా కోట్లు సంపాదిస్తున్నారని చంద్రబాబు అన్నారు. ఖనిజాల తవ్వకం పేరిట రాష్ట్రాన్ని దోచుకుంటున్నారని ఆవేదన వ్యక్తం చేశారు. అక్రమ తవ్వకాలపై ముఖ్యమంత్రి నామమాత్రంగా స్పదిస్తున్నారని విమర్శించారు. గనుల అక్రమ తవ్వకాలపై తాము ఐదేళ్లుగా పోరాటం చేస్తున్నామని తెలిపారు. ఆంధ్రప్రదేశ్‌లో జిందాల్‌, రస్‌అల్‌ఖైమా ఒప్పందాలను ఎందుకు రద్దు చేయట్లేదని ఆయన అడిగారు. అక్రమంగా మైనింగ్ తో కొంత మంది ధనవంతులవుతున్నారని ఆయన అన్నారు. అక్రమ ఖనిజ తవ్వకాలను రద్దు చేయడంలో ప్రభుత్వం భేషిజాలకు పోవద్దని ఆయన సూచించారు.