చంద్రబాబు నాయుడు నోట తెలంగాణ విమోచన దినోత్సవం మాట

హైదరాబాద్: తెలుగుదేశం పార్టీ అధ్యక్షుడు నారా చంద్రబాబు నాయుడి నోట తెలంగాణ మాట వినిపించింది. తెలంగాణపై తన వైఖరి మీద తీవ్ర విమర్శలు వస్తున్న నేపథ్యంలో చంద్రబాబు శుక్రవారం మీడియా ప్రతినిధుల సమావేశంలో తెలంగాణ పేరెత్తారు. తెలంగాణ దినోత్సవాన్ని ప్రభుత్వం అధికారికంగా నిర్వహించాలని ఆయన డిమాండ్ చేశారు. తాము నాలుగైదేళ్లుగా పార్టీ కార్యాలయంలో తెలంగాణ విమోచన దినోత్సవాన్ని నిర్వహిస్తున్నట్లు ఆయన తెలిపారు. ప్రభుత్వం వాటిని నిర్వహించడం తప్పేమీ కాదని ఆయన అన్నారు. తెలంగాణ విమోచన దినోత్సవాన్ని ప్రభుత్వం అధికారికంగా నిర్వహించాలని తెలంగాణ రాష్ట్ర సమితి నాయకులు, కాంగ్రెసు, తెలుగుదేశం తెలంగాణ నాయకులు డిమాండ్ చేస్తున్నారు.

కాగా, తెలంగాణ విమోచన దినోత్సవాన్ని ప్రభుత్వం అధికారికంగా నిర్వహించేలా ఆదేశించాలని కోరుతూ శుక్రవారం హైకోర్టులో ఓ పిటిషన్ దాఖలైంది. చంద్రశేఖర రెడ్డి అనే న్యాయవాది ప్రజా ప్రయోజనాల వ్యాజ్యం (పిల్) కింద ఆయన పిటిషన్ దాఖలు చేశారు. కర్నాటక, మహారాష్ట్ర తరహాలో తెలంగాణ విమోచన దినోత్సవాన్ని ప్రభుత్వం అధికారికంగా నిర్వహించి, సెప్టెంబర్ 17ను సెలవు దినంగా ప్రకటించాలని ఆయన కోరారు. దేశానికి ఆగస్టు 15వ తేదీన స్వాతంత్ర్యం రాగా, హైదరాబాదు రాజ్యంలో భాగమైన తెలంగాణ మాత్రం నిజాం పాలనలోనే ఉంది. సెప్టెంబర్ 17వ తేదీన నిజాం యూనియన్ ప్రభుత్వానికి లొంగిపోవడంతో తెలంగాణ భారతదేశంలో భాగమైంది.