వైయస్ జగన్ ప్రకాశం జిల్లా ఓదార్పుపై డిఎస్ ఆపరేషన్

హైదరాబాద్: తమ పార్టీ కడప పార్లమెంటు సభ్యుడు వైయస్ జగన్ ప్రకాశం జిల్లా ఓదార్పు యాత్రపై ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ ఆపరేషన్ ప్రారంభించారు. అధిష్టానం నుంచి కచ్చితమైన సూచనలు అందుకున్న డిఎస్ ప్రకాశం జిల్లాలో పార్టీ నాయకులను, శాసనసభ్యులను ఓదార్పు యాత్రకు దూరం చేసేందుకు రంగంలోకి దిగారు. ఆయన శుక్రవారం ప్రకాశం జిల్లా నాయకులు, శాసనసభ్యులతో సమావేశమయ్యారు. జగన్ ఓదార్పుపై, తాజా రాజకీయ పరిణామాలపై ఆయన వారితో చర్చలు జరిపినట్లు చెబుతున్నారు. అయితే, ఓదార్పు యాత్రను కట్టడి చేయడం మీదనే వారు ఎక్కువ మాట్లాడుకున్నట్లు సమాచారం.

డిఎస్ తో సమావేశమైనవారిలో శాసనసభ్యులు దగ్గుబాటి వెంకటేశ్వర రావు, జివి శేషులతో పాటు డిల్లా కాంగ్రెసు కమిటీ (డిసిసి) అధ్యక్షుడు పోతుల రామావారు ఉన్నారు. జగన్ ఓదార్పు యాత్రపై మీడియా ప్రతినిధులతో మాట్లడడానికి దగ్గుబాటి వెంకటేశ్వర రావు నిరాకరించారు. డిఎస్ తో ఓదార్పు యాత్రపై చర్చించలేదని, మర్యాదపూర్వకంగానే తాను డిఎస్ ను కలుసున్నానని ఆయన చెప్పారు. జగన్ ఓదార్పు యాత్ర విషయంలో జిల్లా నాయకులు పార్టీ అధిష్టానం నిర్ణయానికే కట్టుబడి ఉన్నట్లు పోతుల రామారావు చెప్పారు.