జగన్ భయం: పిసిసి అధ్యక్షుడి ఎన్నికకు నోటిఫికేషన్ నో

న్యూఢిల్లీ: ప్రదేశ్ కాంగ్రెసు కమిటీ (పిసిసి) అధ్యక్షుడి ఎన్నికకు శుక్రవారం జారీ చేయాల్సిన నోటిఫికేషన్ ను ఎఐసిసి పెండింగులో పెట్టింది. పిసిసి అధ్యక్షుడి ఎన్నికకు నోటిఫికేషన్ జారీ అయ్యే అవకాశాలు కూడా లేవని తెలుస్తోంది. కడప పార్లమెంటు సభ్యుడు వైయస్ జగన్ వ్యవహారం, తెలంగాణ ప్రత్యేకోద్యమం వల్ల పిసిసి అధ్యక్షుడి ఎన్నికను వాయిదా వేసినట్లు తెలుస్తోంది. అయితే, రాష్ట్ర ఎన్నికల అధికారి సుదర్శన్ నాచియప్ప మాత్రం వేరే కారణాలు చెబుతున్నారు. తాజా రాజకీయ పరిణామాల వల్ల, జిల్లా ఎన్నికల అధికారుల నుంచి సమాచారం లేకపోవడం వల్ల నోటిఫికేషన్ జారీ చేయలేదని ఆయన మీడియా ప్రతినిధులతో అన్నారు.

కాగా, పిసిసి అధ్యక్షుడ్ని కాంగ్రెసు అధ్యక్షురాలు సోనియా గాంధీయే నామినేట్ చేసే అవకాశాలున్నట్లు చెబుతున్నారు. అది కూడా ఇప్పట్లో జరగకపోవచ్చు. సెప్టెంబర్ 17వ తేదీన సోనియా గాంధీ ఎఐసిసి అధ్యక్షురాలిగా లాంఛనంగా ఎన్నికవుతారు. ఆ తర్వాత ఆమె రాష్ట్ర పరిస్థితులపై దృష్టి పెడతారని అంటున్నారు. జగన్ వ్యవహారం ఒక కొలిక్కి రావడంతో పాటు రాష్ట్ర పరిస్థితులపై శ్రీకృష్ణ కమిటీ నివేదిక అందిన తర్వాతనే పిసిసి అధ్యక్షుడి నామినేషన్ జరవచ్చునని అంటున్నారు.