మావోయిస్టులతో ఎదురుకాల్పులు: ముగ్గురు జవాన్లు మృతి

ఖమ్మం: ఛత్తీస్ ఘడ్ రాష్ట్రంలో మావోయిస్టులు మరోసారి రెచ్చిపోయారు. మావోయిస్టుల చేతిలో ముగ్గురు సిఆర్పీఎఫ్ జవాన్లు మృతి చెందగా, ఆరుగురు జవాన్లు గాయపడ్డారు. ఛత్తీస్ ఘడ్ లోని కాంకేర్ జిల్లా దుర్గం కొండల్ గ్రామ సమీపంలో సిఆర్పిఎప్ జవాన్లకు, మావోయిస్టులకు మధ్య ఎదురుకాల్పులు జరుగుతున్నాయి. ఈ ఎదురు కాల్పుల్లో ముగ్గురు జవాన్లు మరణించారు.

దాదాపు 40మంది మావోయిస్టులు గాలింపు చర్యలకు వచ్చిన సిఆర్పీఎఫ్ జవాన్లను చుట్టుముట్టి కాల్పులు జరిపినట్లు సమాచారం. ఈ సమయంలో ఇరు పక్షాల మధ్య ఆదివారం ఉదయం ఐదు గంటలకు ప్రారంభమైన ఎదురుకాల్పులు ఇంకా కొనసాగుతున్నాయి. గాయపడిన వారిని ఆస్పత్రికి తరలించేందుకు సంఘటనా స్థలానికి హెలికాప్టర్ ను పంపించారు. గత రెండు రోజులుగా మావోయిస్టుల కోసం సిఆర్పీఎఫ్ జవాన్లు గాలింపు చేస్తున్నారు.