వైయస్ జగన్ సొంత పార్టీ పెట్టరు: వేకపాటి రాజమోహన్ రెడ్డి

గుంటూరు: కడప పార్లమెంటు సభ్యుడు వైయస్ జగన్ తమ పార్టీని విడిచి వెళ్లరని, జగన్ పార్టీలోనే ఉంటారని కాంగ్రెసు పార్లమెంటు సభ్యుడు మేకపాటి రాజమోహన్ రెడ్డి అన్నారు. కాంగ్రెసు పార్టీని జగన్ చీల్చడం ఉద్దేశంతో లేరని, సొంత పార్టీ పెట్టే ఆలోచనలో లేరని ఆయన సోమవారం మీడియా ప్రతినిధుల సమావేశంలో అన్నారు. జగన్ అవసరం పార్టీకి ఉందని ఆయన అభిప్రాయపడ్డారు. జగన్ పై చర్య తీసుకునే విషయంలో తమ పార్టీ అధిష్టానం తొందరపడదని ఆయన అన్నారు.

సమస్యలు త్వరలోనే పరిష్కారమవుతాయని ఆయన ఆశాభావం వ్యక్తం చేశారు. ప్రకాశం జిల్లా చీరాలలో వైయస్సార్ విగ్రహ ప్రతిష్టాపన వివాదం చాలా చిన్న సమస్య అని, దాన్ని పెద్దదిగా చేస్తున్నారని ఆయన విమర్శించారు. సోనియా గాంధీకి అందరం విధేయులమేనని, కొందరు అవిధేయత ప్రదర్శిస్తున్నారని ఆయన అన్నారు. దివంగత నేత వైయస్ రాజశేఖర రెడ్డికి ఉన్నంత చరిష్మా ప్రస్తుత ముఖ్యమంత్రి కె. రోశయ్యకు లేదని ఆయన అన్నారు.