ఒయులో సీమాంధ్ర లెక్చర్లపై దాడిపై నలుగురితో కమిటీ

హైదరాబాద్‌: ఉస్మానియా విశ్వవిద్యాలయంలో సీమాంధ్రపై అధ్యాపకులపై దాడి ఘటనపై వైస్ చాన్సలర్ తిరుపతిరావు నలుగురితో ఓ కమిటీని ఏర్పాటు చేశారు. ఈ కమిటీ విద్యార్థుల అపోహలు తొలగించడానికి సూచనలు చేస్తుందని ఆయన చెప్పారు. ఈ కమిటీలో నాగేశ్వర్, లక్ష్మయ్య మరో ఇద్దరు ఉంటారు. విద్యార్థులు సంయమనం పాటించారని ఆయన మంగళవారం మీడియా ప్రతినిధులతో అన్నారు. విద్యార్థులు తమను అవమానించారని విద్యార్థులు తనకు చెప్పలేదని ఆయన అన్నారు. విశ్వవిద్యాలయంలో జరిగిన సంఘటనను మీడియానే పెద్దది చేసిందని ఆయన విమర్శించారు.

తమ విద్యార్థులంతా బుద్ధిమంతులని ఆయన కితాబు ఇచ్చారు. సమస్యలు ఉంటే తాము కూర్చుని పరిష్కరించుకుంటామని ఆయన చెప్పారు. విద్యార్థులు ఆంధ్రావాళ్లను కొడితే ఒయులో ఉండగలరా అని ఆయన ప్రశ్నించారు. ప్రశాంతంగా ఉన్న రాష్ట్రాన్ని మీడియా భగ్గుమనిపిస్తోందని ఆయన ఆగ్రహం వ్యక్తం చేశారు. స్పాట్ వాల్యుయేషన్ లో విద్యార్థులకు అన్యాయం జరగకుండా చూస్తామని ఆయన హామీ ఇచ్చారు. కమిటీ నివేదిక వచ్చే వరకు స్పాట్ వాల్యుయేషన్ ను నిలిపేస్తున్నట్లు ఆయన తెలిపారు.