ముఖ్యమంత్రి రోశయ్య ఢిల్లీ పర్యటన రద్దు

హైదరాబాద్‌: ముఖ్యమంత్రి రోశయ్య ఢిల్లీ పర్యటన రద్దయ్యింది. సోనియా గాంధీ ఏఐసీసీ అధ్యక్ష ఎన్నికల నామినేషన్‌ దాఖలు కార్యక్రమంలో మంగళవారం ఆయన పాల్గొనాల్సి ఉంది. అయితే, ఎఐసిసి అధ్యక్షురాలిగా సోనియా నామినేషన్ ను బలపరుస్తూ సంతకం చేసిన పత్రాలను ఆయన ప్రదేశ్ కాంగ్రెసు కమిటీ (పిసిసి) అధ్యక్షుడు డి. శ్రీనివాస్ ద్వారా ఢిల్లీకి పంపారు.

బుధవారం ప్రధాని డాక్టర్ మన్మోహన్ సింగ్ రాష్ట్ర పర్యటనకు వస్తున్నారు. దీని కారణంగానే రోశయ్య తన ఢిల్లీ పర్యటనను రద్దు చేసుకున్నట్లు సమాచారం. మన్నవరం ప్రాజెక్టుకు, తిరుపతి విమానాశ్రయానికి ప్రధాని బుధవారం శంకుస్థాపన చేయనున్నారు. ఈ రెండు కార్యక్రమాలు కూడా చాలా కాలంగా వాయిదా పడుతూ వస్తోంది.