వైయస్ జగన్ ఓదార్పునకు మెజారిటీ ఎమ్మెల్యేలు దూరమే

ఒంగోలు: తమ కాంగ్రెసు పార్టీ అధిష్టానం వైఖరి కచ్చితంగా వెల్లడి కావడంతో కడప పార్లమెంటు సభ్యుడు వైయస్ జగన్ ఓదార్పు యాత్రకు దూరంగా ఉండాలని ప్రకాశం జిల్లాలోని మెజారిటీ శాసనసభ్యులు నిర్ణయించుకున్నారు. తమపై జగన్ వర్గం నుంచి ఒత్తిడి వచ్చినా పట్టించుకోకూడదనే నిర్ణయానికి వచ్చారు.ప్రకాశం జిల్లా ఓదార్పు యాత్రకు ఏర్పాట్లు పూర్తయ్యాయి. మంత్రి బాలినేని శ్రీనివాసరెడ్డి, వైఎస్‌ తోడల్లుడు వై.వి.సుబ్బారెడ్డి, దర్శి ఎమ్మెల్యే శివప్రసాదరెడ్డి మొత్తం యాత్రను పర్యవేక్షిస్తున్నారు. బాలినేని, శివప్రసాదరెడ్డి మినహా ఎమ్మెల్యేలెవరూ యాత్రలో పాల్గొనే అవకాశాలు లేవు. కనిగిరి వంటి కొన్ని చోట్ల ఎమ్మెల్యేలపై జగన్‌ శిబిరం ఒత్తిడి తెచ్చే ప్రయత్నాలు ఇప్పటికీ కొనసాగిస్తూనే ఉంది. అయితే జగన్‌పై సోనియాగాంధీ ఆగ్రహంతో ఉన్నారనే వాస్తవాన్ని గ్రహించిన ఎమ్మెల్యేలు యాత్రవైపు కన్నెత్తి చూసేందుకు కూడా భయపడుతున్నారు.

నియోజకవర్గాల్లోని ద్వితీయ, తృతీయశ్రేణి నేతలతో మాట్లాడుతూ అన్నివిధాలా అండగా ఉంటామని బాలినేని శ్రీనివనాస రెడ్డి, వైవి సుబ్బారెడ్డి హామీలిస్తున్నారు. ఎమ్మెల్యేలు రాకున్నా యాత్ర దిగ్విజయంగా సాగించి సత్తా చాటుకోవాలనే పట్టుదలతో వ్యవహరిస్తున్నారు. రెండురోజులుగా పరస్పరం సంప్రదించుకుంటూ..యాత్రకు దూరంగా ఉండే విషయంలో కలిసికట్టుగా వ్యవహరించాలనుకుంటుని శాసనసభ్యులు అనుకుంటున్నారు. యర్రగొండపాలెం ఎమ్మెల్యే సురేష్‌ను యాత్రలో పాల్గొనాల్సిందిగా స్థానికంగా బలమైన వర్గం గట్టి ఒత్తిడి తెస్తోంది. దాంతో ఆయన ఉక్కిరిబిక్కిరవుతున్నారు. ఒత్తిడికి ఆయన లొంగకుండా చూసేందుకు కొంతమంది సీనియర్‌ నేతలు ప్రయత్నిస్తున్నారు. మరోవైపు, తన లోక్‌సభ నియోజకవర్గం పరిధిలోకొచ్చే కందుకూరు అసెంబ్లీ స్థానంలోకి యాత్ర ప్రవేశించినప్పుడు తాను పాల్గొంటానని నెల్లూరు ఎంపీ మేకపాటి రాజమోహన్‌రెడ్డి ఇప్పటికే ప్రకటించారు.