హైకోర్టుకెక్కిన పవన్ కళ్యాణ్ కొమరం పులి వివాదం

చెన్నై: పవన్ కళ్యాణ్ హీరోగా నటించిన 'కొమరం పులి' చిత్రం విడుదల వ్యవహారం మద్రాస్ హైకోర్టుకెక్కింది. చిత్ర నిర్మాత ఎస్.రమేశ్ తమకు బకాయిపడ్డ రూ. 1.85 కోట్లు ఇప్పించాలని కోరుతూ రవిప్రసాద్ యూనిట్ అధినేత రవి మూడు రోజుల క్రితం పిటిషన్ దాఖలు చేశారు. దీనిపై శుక్రవారం విచారణ జరిగింది. ఈ వివాదాన్ని పరిష్కరించుకునేందుకు ఈ నెల 7 వరకు గడువివ్వాలని రమేశ్ కోర్టును అభ్యర్థించారు. తనకు అప్పులు చెల్లించే స్థోమత ఉన్నట్లుగా స్థిరాస్తులను గ్యారంటీగా చూపించారు.

ఇందుకు అంగీకరించిన హైకోర్టు విచారణను మంగళవారానికి వాయిదా వేసింది. గతంలో రమేశ్ తమిళంలో 'పోకిరి', 'నంనాడు' చిత్రాలను నిర్మించారు. రవిప్రసాద్ యూనిట్‌కు భారీగా బకాయి పడ్డారు. వాటిని తీర్చేందుకు రమేశ్ ఇచ్చిన చెక్కులు బౌన్స్ అయ్యాయి. దీంతో కోర్టును ఆశ్రయించినట్లు రవి తెలిపారు.