తెలంగాణ ఎంపిలపై ఫైర్: ముదురుతున్న వివాదం

న్యూఢిల్లీ: కాంగ్రెసులోని తెలంగాణ, సీమాంధ్ర పార్లమెంటు సభ్యుల మధ్య వివాదం ముదురుతోంది. ఎపిపిఎస్సీ గ్రూప్ వన్ పరీక్షను వాయిదా వేయాలని ఆదివారం తలపెట్టిన బంద్ సందర్బంగా తెలంగాణ పార్లమెంటు సభ్యులపై సీమాంధ్ర పార్లమెంటు సభ్యుడు అనంత వెంకట్రామిరెడ్డి మండి పడ్డారు. తెలంగాణ రాష్ట్ర సమితి (తెరాస) శాసనసభా పక్ష నేత ఈటెల రాజేందర్ తో తమ కాంగ్రెసు పార్టీ పార్లమెంటు సభ్యులు కరచాలనం చేయడాన్ని ఆయన తప్పు పట్టారు. తెరాస తలపెట్టిన బంద్ లో తమ పార్టీ ఎంపీలు పాల్గొనడం సిగ్గు చేటు అని ఆయన అన్నారు.

తెరాసతో తమ పార్టీ కాంగ్రెసు ఎంపిలు చేతులు కలిపారని ఆయన ఆరోపించారు. తద్వారా వారు పార్టీ క్రమశిక్షణను ఉల్లంఘించారని ఆయన విమర్శించారు. వారిపై చర్యలు తీసుకోవాలని తాము తమ పార్టీ అధ్యక్షురాలు సోనియాను కోరుతామని ఆయన చెప్పారు. రేపు సీమాంధ్ర ఎంపిలు సమావేశమై చర్చించి సోనియాను కలుస్తారని ఆయన చెప్పారు. తెరాసతో చేతులు కలపడం వల్లనే ఉప ఎన్నికల్లో తమ కాంగ్రెసు పార్టీ ఓడిపోయిందని ఆయన అన్నారు. తెలంగాణ ఎంపిలపై చర్య తీసుకోకపోతే పార్టీకి నష్టం వాటిల్లుతుందని ఆయన అన్నారు.