వైయస్సార్ విగ్రహ స్థాపనపై నెల్లూరులో రగడ

నెల్లూరు: నెల్లూరులో దివంగత నేత వైయస్ రాజశేఖర రెడ్డి విగ్రహ స్థాపనపై తీవ్ర వివాదం చోటు చేసుకుంది. వైయస్సార్ విగ్రహ స్థాపనకు అధికారులు అభ్యంతర పెట్టడంతో కడప కాంగ్రెసు పార్లమెంటు సభ్యుడు వైయస్ జగన్ వర్గానికి చెందినవారు వివాదానికి సోమవారం దిగారు. అధికారులతో జగన్ వర్గానికి చెందిన కోటం శ్రీధర్ రెడ్డి, ఆయన అనుచరులు గొడవకు దిగారు. దీంతో అక్కడ భారీగా పోలీసులను మోహరించారు. పోలీసులకు, శ్రీధర్ రెడ్డి వర్గానికి మధ్య తోపులాట చోటు చేసుకుంది. అక్కడ తీవ్ర ఉద్రిక్తత నెలకొంది. నెల్లూరులో ఓదార్పు యాత్ర సందర్భంగా జగన్ ఆ విగ్రహాన్ని ఆవిష్కరించాల్సి ఉంది.

వైయస్ విగ్రహ ప్రతిష్టాపనపై జగన్ అనుకూల, వ్యతిరేక వర్గాల మధ్య తీవ్ర వివాదం చోటుచేసుకుంది. విగ్రహ ప్రతిష్టాపనకు ఆనం సోదరులు అడ్డు పడుతున్నారని కోటంరెడ్డి శ్రీధర్ రెడ్డి విమర్శించారు. ముఖ్యమంత్రి కె. రోశయ్య మెప్పు కోసం రాజకీయ ప్రయోజనాల కోసం మంత్రి ఆనం రామనారాయణ రెడ్డి, ఆనం వివేకానంద రెడ్డి వైయస్సార్ విగ్రహ ప్రతిష్టాపనను అడ్డుకుంటున్నారని ఆయన అన్నారు. పార్లమెంటు సభ్యుడు మేకపాటి రాజమోహన్ రెడ్డి లేఖ రాసినా విగ్రహ ప్రతిష్టాపనకు అధికారులు అనుమతి ఇవ్వకపోవడాన్ని ఆయన తప్పు పట్టారు. తొలుత వైయస్ జగన్ కు అనుకూలంగా ఉన్న ఆనం సోదరులు అధిష్టానం వైఖరి స్పష్టం కావడంతో వ్యతిరేకంగా మారారు.