సచివాలయంలో సిఎం ఆఫీసు వద్ద టిడిపి నేతల హల్ చల్

హైదరాబాద్: ఫీజుల రీయంబర్స్ మెంటు సమస్యపై తెలుగుదేశం పార్టీ నాయకులు సోమవారం సచివాలయంలోని ముఖ్యమంత్రి కార్యాలయం ముందు హడావిడి చేశారు. ముఖ్యమంత్రి కార్యాలయం ముందు వారు ధర్నాకు దిగారు. వారిని పోలీసులు అరెస్టు చేశారు. దానికి ముందు తెలుగుదేశం నాయకులు పోలీసులతో వాగ్వివాదానికి దిగారు. పోలీసులకు, తెలుగుదేశం నాయకులకు మధ్య తోపులాట చోటుచేసుకుంది. విద్యార్థుల సమస్యను విన్నవించడానికి వస్తే ముఖ్యమంత్రి కలవడానికి సిద్ధంగా లేరని తెలుగుదేశం నాయకుడు రావుల చంద్రశేఖర రెడ్డి విమర్శించారు. ముఖ్యమంత్రికి ఆరోగ్యం సరిగాలేదని చెబుతున్నారని ఆయన అన్నారు. సబ్ కమిటీ సభ్యులు కూడా కలవడానికి ముందుకు రాలేదని ఆయన అన్నారు.

అయితే, తెలుగుదేశం వాదనలను అధికార వర్గాలు వ్యతిరేకిస్తున్నాయి. తనకు ఆరోగ్యం సరిగా లేకున్నా ముఖ్యమంత్రి తెలుగుదేశం నాయకులను తన ఇంటికి ఆహ్వానించారని, వారు సిఎం వద్దకు వెళ్లకుండా సచివాలయంలో గొడవకు దిగారని అంటున్నారని అంటున్నారు. మంత్రి పిల్లి సుభాష్ చంద్రబోస్ ఆహ్వానిస్తే తెలుగుదేశం నాయకులు వెళ్లలేదని చెబుతున్నారు.