కాంగ్రెసు గొడవ: సీమాంధ్ర నేతలపై తెలంగాణ నేతల గుర్రు

హైదరాబాద్: కాంగ్రెసు సీమాంధ్ర, తెలంగాణ నేతల మధ్య మాటల యుద్దం సాగుతోంది. ఎపిపిఎస్సీ గ్రూప్ వన్ పరీక్షపై తీసుకున్న భిన్న వైఖరులపై పరస్పరం విమర్సలు చేసుకుంటున్నారు. తెలంగాణ పార్లమెంటు సభ్యులను సీమాంధ్ర నేతలు తప్పు పట్టగా తెలంగాణ పార్లమెంటు సభ్యులు వారిపై ఎదురు దాడికి దిగారు. సీమాంధ్ర నేతలు అహంకార, ఆధిపత్య ధోరణి ప్రదర్సిస్తున్నారని తెలంగాణ పార్లమెంటు సభ్యుడు రాజయ్య అన్నారు. తాము తెలంగాణ రాష్ట్ర సమితి (తెరాస)తో కుమ్మక్కయినట్లు ఇంటిలిజెన్స్ నివేదికలు చూపగలరా అని ఆయన సీమాంధ్ర కాంగ్రెసు నాయకులను అడిగారు. గ్రూప్ వన్ పరీక్ష విషయంలో తాము తమ ప్రాంత విద్యార్థుల ప్రయోజనాల కోసం నిలబడ్డామని ఆయన చెప్పారు.

సీమాంధ్ర నేతల వైఖరిని కాంగ్రెసు నల్లగొండ పార్లమెంటు సభ్యుడు గుత్తా సుఖేందర్ రెడ్డి తప్పు పట్టారు. తమ పార్టీ సీమాంధ్ర పార్లమెంటు సభ్యులు రాయపాటి సాంబశివరావు, లగడపాటి రాజగోపాల్ మాటలు సరైనవి కావని ఆయన సోమవారం నల్లగొండలో మీడియా ప్రతినిధులతో అన్నారు. పోలీసు పహరాలో గ్రూప్ వన్ పరీక్ష నిర్వహించడాన్ని ఆయన తప్పు పట్టారు. తెలంగాణ ప్రజలను రెచ్చగొట్టవద్దని ఆయన సీమాంధ్ర నేతలకు సూచించారు. తెలంగాణ రాష్ట్ర ఏర్పాటుకు డిసెంబర్ 9వ తేదీన కేంద్ర హోం మంత్రి చిదంబరం ప్రకటనను అమలు చేయించుకోవడమే తమ ముందున్న కర్తవ్యమని ఆయన అన్నారు. తెలంగాణ రాష్ట్ర సాధనే తమ ప్రధాన లక్ష్యమని ఆయన చెప్పారు.