వైయస్ జగన్ రాజా ఆఫ్ కరప్షన్: బైరెడ్డి రాజశేఖర రెడ్డి

హైదరాబాద్: వైఎస్‌ రాజశేఖర్ ‌రెడ్డి సీఎంగా ఉన్న కాలంలో సంపాదించిన ఆస్తుల గురించి కాంగ్రెసు నేతలు ఇప్పుడు లెక్క చెబుతున్నారని కానీ తాము ఆనాడే 'రాజా ఆఫ్‌ కరప్షన్‌' పేరుతో పుస్తకం వేసి మరీ వెల్లడించామని తెలుగుదేశం పార్టీ అధికార ప్రతినిధి బైరెడ్డి రాజశేఖర రెడ్డి అన్నారు. పులివెందులలో వైఎస్‌ తండ్రి రాజారెడ్డి ఫ్యాక్షనిజం మొదలుపెట్టి, రాయలసీమంతా వ్యాప్తి చేశారని, తర్వాత ఖనిజ సంపద దోపిడీ చేశారని, ఆ సొమ్ముతోనే రాజకీయాల్లోకి వచ్చారని ఆయన మంగళవారం సాయంత్రం మీడియా ప్రతినిధుల సమావేశంలో విమర్శించారు. 2004 నాటికి రూ.1.5 కోట్ల ఆస్తిని అఫిడవిట్‌లో చూపించిన వైఎస్‌ రాజశేఖర్‌రెడ్డి ఆరేళ్ల కాలంలో లక్ష కోట్లను ఎలా సంపాదించారో చెప్పాలని డిమాండ్‌ చేశారు. గనులు, భూములు, జలయజ్ఞం - ఇలా ప్రతిదానిలోనూ దోపిడీ చేశారని పేర్కొన్నారు. ఈ లక్ష కోట్ల అక్రమ సంపాదన మూటను జగన్ ‌కు ఇచ్చిపోయారంటూ ఎద్దేవా చేశారు. ఇప్పుడు జగన్‌ ఆ అక్రమ సంపాదనకు వారసుడా? ముఠాతత్త్వానికి వారసుడా? ఆయనే చెప్పాలని కోరారు.

గతంలో నీలం సంజీవరెడ్డి, దామోదరం సంజీవయ్య, కాసు బ్రహ్మానందరెడ్డి, ఎన్టీఆర్‌, కోట్ల విజయభాస్కర్‌రెడ్డి ఇలా పలువురు సీఎంలుగా చేశారని, కానీ వీరంతా సొంతిల్లు అభివృద్ధి చేసుకోవాలన్నా ప్రజలు ఏమనుకుంటారో అని భయపడేవారిని, వైఎస్‌ మాత్రం నిస్సిగ్గుగా రాష్ట్రాన్ని దోచేశారన్నారు. వైఎస్‌ను అవినీతి చక్రవర్తిగా అభివర్ణించారు. వైఎస్‌కోసం ఏ ఒక్కరూ చనిపోలేదని, పులివెందులలో కూడా ఎవరూ చనిపోలేదని, కనీసం నిత్యం వైఎస్‌నే అంటిపెట్టుకు ఉండే తెల్లజుట్టు సూరీడు కూడా చనిపోలేదన్నారు. తమ కర్నూలు జిల్లాకు వస్తే ఆ జిల్లాలో ఎవరెవరు ఏయే కారణాలతో చనిపోయారో నిరూపిస్తానన్నారు. వైఎస్‌ రాజశేఖర్‌రెడ్డి అక్రమ సంపాదనపై సీబీఐ విచారణ జరిపించాలని డిమాండ్‌ చేశారు.