న్యాయవాదుల చలో హైకోర్టు, ధర్నాలతో ఉద్రిక్తత

హైదరాబాద్: హైకోర్టులో తెలంగాణ ఉద్యోగుల వాటాకోసం పోరాడుతున్న లాయర్ల సమ్మె బుధవారం నాటికి మూడో రోజుకు చేరుకుంది. తెలంగాణ లాయర్ల ఐకాస(జెఏసి) ఇచ్చిన చలో హైకోర్టు పిలుపు మేరకు బుధవారం న్యాయవాదులు భారీగా తరలి వచ్చారు. తెలంగాణలోని పది జిల్లాలనుంచి న్యాయవాదులు తరలి వచ్చారు. వారంతా కోర్టు ఎదుట ధర్నా నిర్వహిస్తున్నారు. ప్రభుత్వానికి వ్యతిరేకంగా, తెలంగాణకు అనుకూంగా నినాదాలు చేస్తున్నారు. ఐకాస ఆధ్వర్యంలో నేడు న్యాయవాదులు విధులు బహిష్కరించారు. లాయర్ల ఐకాస చలో హైకోర్టు పిలుపుకు రాజకీయ ఐకాస మద్దతు తెలిపింది.

ధర్నా కారణంగా ఎలాంటి ఉద్రిక్త పరిస్థితులు తలెత్తకుండా భారీగా పోలీసులను మోహరించారు. అయితే ప్రభుత్వం ఏదో యుద్ధ వాతావరణాన్ని సృష్టించడానికా అన్నట్టు అక్కడ ధర్నా చేస్తున్న న్యాయవాదుల కన్నా పోలీసులే ఎక్కువ ఉండటం గమనార్హం. ఈ నేపథ్యంలో ఐడి కార్డులున్న జడ్జిలు, న్యాయవాదులనే పోలీసులు కోర్టులోకి అనుమతిస్తున్నారు. ధర్నా కారణంగా ట్రాఫిక్ జాం అయింది. తెలంగాణ లాయర్ల ఐకాస నాయకుడు వెంకట్ యాదవ్ మాట్లాడుతూ 42 శాతం వాటా వచ్చే వరకు తమ ఉద్యమం ఆపేది లేదని తేల్చి చెప్పారు. ప్రభుత్వం తెలంగాణ పట్ల చిన్న చూపు చూస్తుందన్నారు.

హైకోర్టు ఎదుట తెలంగాణ లాయర్ల ఐకాస ఆధ్వర్యంలో నిర్వహిస్తోన్న ధర్నాకు మద్దతుగా తెలంగాణలోని వరంగల్, నల్గొండ వంటి పలు ప్రాంతాల్లో జిల్లా సెషన్స్ కోర్టులలో న్యాయవాదులు స్వచ్ఛందంగా విధులు బహిష్కరించి మద్దతు తెలిపారు.