తెలంగాణ న్యాయవాదుల వాటా ఆందోళనకు చంద్రబాబు మద్దతు

హైదరాబాద్: న్యాయవ్యవస్థకు సంబంధించి ఉద్యోగ నియామకాల్లో 42 శాతం వాటా ఇవ్వాలని ఆందోళన చేస్తున్న తెలంగాణ న్యాయవాదుల పట్ల తెలుగుదేశం పార్టీ అధ్యక్షుడు నారా చంద్రబాబు ఉదారత ప్రదర్శించారు. వారి ఆందోళనకు ఆయన గురువారం మీడియా ప్రతినిధుల సమావేశంలో మద్దతు ప్రకటించారు. తెలంగాణ న్యాయవాదుల న్యాయమైందేనని ఆయన అన్నారు. తమ ప్రభుత్వ హయాంలో 42 శాతం వాటా ఇచ్చామని ఆయన చెప్పారు. అన్యాయం జరిగింది కాబట్టే తెలంగాణ న్యాయవాదులు ఆందోళన చేస్తున్నారని ఆయన అన్నారు.

తెలంగాణ రాష్ట్ర సమితి (తెరాస) అధ్యక్షుడు కె. చంద్రశేఖర రావు మాటలతో తమకు సంబంధం లేదని ఆయన అన్నారు. సెప్టెంబర్ 17వ తేదీన తెలంగాణ విమోచన దినోత్సవ నిర్వహణపై నిర్ణయం తీసుకుంటామని ఆయన చెప్పారు. ఈ విషయంలో ముస్లింల మనోభావాలను కూడా పరిగణనలోకి తీసుకోవాల్సి ఉంటుందని ఆయన అన్నారు. ఎవరి మనసులు నొప్పించకుండా వ్యవహరిస్తామని ఆయన చెప్పారు.