జగన్ కు పెద్ద దెబ్బ: నెల్లూరు డిసిసి అధ్యక్షుడు గోపాల్ రెడ్డికి షోకాజ్

హైదరాబాద్: పార్టీ అధిష్టానాన్ని ధిక్కరిస్తూ ఓదార్పు యాత్ర చేస్తున్న కాంగ్రెసు కడప పార్లమెంటు సభ్యుడు వైయస్ జగన్ కు పెద్ద దెబ్బ తగిలింది. నెల్లూరు జిల్లాలో ఆయన ఓదార్పు యాత్రకు ఏర్పాట్లు చేస్తున్న డిసిసి అధ్యక్షుడు గోపాల రెడ్డికి ప్రదేశ్ కాంగ్రెసు కమిటీ (పిసిసి) షోకాజ్ నోటీసు జారీ చేసింది. జగన్ ఓదార్పు యాత్రలో పాల్గొనాలని పిలుపునిచ్చిందుకు గోపాల్ రెడ్డికి పిసిసి షోకాజ్ నోటీసు ఇచ్చింది. పిసిసి సమన్వయకర్త రుద్రరాజు పద్మరాజు గురువారం ఈ నోటీసును జారీ చేశారు.

కాంగ్రెసు పార్లమెంటు సభ్యుడు మేకపాటి రాజగోపాల్ రెడ్డితో కలిసి గోపాల్ రెడ్డి వైయస్ జగన్ ఓదార్పు యాత్రకు ఏర్పాట్లు చేస్తున్నారు. గోపాల్ రెడ్డికి షోకాజ్ నోటీసు జారీ చేయడం ద్వారా జగన్ ఓదార్పు యాత్రలో పాల్గొంటున్నవారికి ఓ హెచ్చరికగా భావిస్తున్నారు. జగన్ ఓదార్పు యాత్రకు పార్టీ అనుమతి లేదనే విషయాన్ని కూడా ఆ రూపంలో చెప్పినట్లయింది.